Top News

လီဗာပူးလ်အသင်းသည် ချန်ပီယံလိဂ်ဆီမီးဖိုင်နယ်တွင် ဗီလာရီးယဲလ်အသင်းကို နှစ်ကျော့ပေါင်း (၅-၂)ဂိုးဖြင့် အနိုင်ရပြီးနောက် တစ်ရာသီအတွင်း ချန်ပီယံလိဂ်(ယခင် ဥရောပဖလား) ဗိုလ်လုပွဲ၊ FA ဖလား ဗိုလ်လုပွဲနှင့် လိဂ်ဖလား (Carabao Cup) ဗိုလ်လုပွဲများသို့ တက်ရောက်နိုင်သည့် ပထမဆုံးအင်္ဂလိပ်အသင်းအဖြစ် မှတ်တမ်းဝင်ခဲ့ကြောင်း သိရှိရသည်။

ပြီးခဲ့သည့် အင်္ဂါနေ့က ကစားခဲ့သည့် ချန်ပီယံလိဂ်ဆီမီးဖိုင်နယ် ဒုတိယအကျော့ပွဲစဉ်၌ လီဗာပူးလ်အသင်းသည် အိမ်ရှင်ဗီလာရီးယဲလ်အသင်းကို ပထမပိုင်းတွင် (ဝ-၂) ဂိုးဖြင့် ရှုံး နိမ့်နေခဲ့သော်လည်း ဒုတိယပိုင်းတွင် ဖာဘင်ညို၊ ဒီယက်ဇ်၊ မာနေတို့၏ သွင်းဂိုးများကြောင့် (၃-၂) ဂိုးဖြင့် အနိုင်ရခဲ့ခြင်းဖြစ်သည်။

ထို့ကြောင့် လီဗာပူးလ်အသင်းသည် ဗီလာရီးယဲလ်အသင်းကို နှစ်ကျော့ပေါင်း (၅-၂)ဂိုးဖြင့် အနိုင်ရကာ ချန်ပီယံလိဂ်ဗိုလ်လုပွဲသို့ နောက်ဆုံး (၅) ရာသီအတွင်း (၃) ကြိမ်မြောက် တက်ရောက်နိုင်ခဲ့သည်။ လီဗာပူးလ်အသင်းသည် ပြီးခဲ့သည့် ဖေဖော်ဝါရီ (၂၇) ရက်က လိဂ်ဖလားဗိုလ်လုပွဲတွင် ချယ်လ်ဆီးအသင်းကို ပယ်နယ်တီအဆုံးအဖြတ်ဖြင့် အနိုင်ရကာ ဗိုလ်စွဲခဲ့ပြီး FA ဖလား ဗိုလ်လုပွဲသို့လည်းတက်ရောက်ထားကာ မေ (၁၄) ရက်တွင် ချယ်လ်ဆီးအသင်းနှင့်ပင် ကစားရမည်ဖြစ်သည်။

ယခုအခါ လီဗာပူးလ်အသင်းအနေဖြင့် ချန်ပီယံလိဂ်ဗိုလ်လုပွဲသို့ တက်ရောက်နိုင်ခဲ့ခြင်းကြောင့် တစ်ရာသီအတွင်း ပြိုင်ပွဲ (၃)ရပ်လုံးတွင် ဗိုလ်လုပွဲတက်ရောက်သည့် ပထမဆုံးအင်္ဂလိပ်အသင်းအဖြစ် မှတ်တမ်းဝင်ခဲ့ခြင်းဖြစ်သည်။

လီဗာပူးလ်အသင်းအနေဖြင့် လက်ရှိတွင် လိဂ်ဖလားကို ဆွတ်ခူးထားပြီးဖြစ်သလို၊ ပ ရီးမီးယားလိဂ်အမှတ်ပေးဇယားရပ်တည်မှုတွင်လည်း ထိပ်ဆုံးမှ မန်စီးတီး (၈၃ မှတ်)နှင့် (၁) မှတ်သာ ကွာဟလျက်ရှိသည်။

ထို့ကြောင့် လီဗာပူးလ်အသင်းသည် ယခုရာသီတွင် ဖလား (၄)လုံးရယူနိုင်သည့် ပထမဆုံးအင်္ဂလိပ်အသင်းအဖြစ် မှတ်တမ်းဝင်ရန်လည်း အနီးစပ်ဆုံးအခြေအနေတွင် ရှိနေကြောင်း ဗြိတိန်မီဒီယာများက သုံးသပ်ဖော်ပြနေကြသည်။