Top News

သြဂုတ် ၂၉ ရက်က စိန်ရတနာ ပရိယတ္တိစာသင်တိုက်တွင် သံဃာတော်များနှင့် ကိုရင်ငယ်များ ဆွမ်းဘုဉ်းပေးနေစဉ် (ဓာတ်ပုံ-အောင်မျိုးသန့်)

၀ါတွင်းကာ၌ Eleven Media Group ဝန်ထမ်းများစုပေါင်း၍ အပတ်စဉ်လှူဒါန်းမှု စတုတ္ထအကြိမ်အဖြစ် တောင်ဥက္ကလာစိန်ရတနာပရိယတ္တိစာသင်တိုက်ရှိ သံဃာတော်များအား ၀ါဆိုသင်္ကန်းနှင့် ကျောင်းရှိသံဃာတော်များအား နေ့ဆွမ်းဆက်ကပ်လှူဒါန်းခဲ့သည်။

၁၃၈၁ ခုနှစ် ၀ါခေါင်လကွယ် (၂၉.၈. ၂၀၁၉) တွင် Eleven Media Grop ဝန်ထမ်းများက ရန်ကုန်တိုင်းဒေသကြီး တောင်ဥက္ကလာပမြို့နယ် ပါရမီလမ်းရှိ အမှတ် (၂) ဝိုင်း စိန်ရတနာပရိယတ္တိစာသင်တိုက် (မိတ္တီလာကျောင်း)ရှိ သံဃာတော်များအား ၀ါဆိုသင်္ကန်း၊ လှူဖွယ်ဝတ္ထုနှင့် နေ့ဆွမ်းဆက်ကပ်လှူဒါန်းခဲ့ကြခြင်းဖြစ်သည်။ ယင်းစိန်ရတနာပရိယတ္တိစာသင်တိုက်တွင် ရဟန်း၊ သာမဏေ စုစုပေါင်း ၁၂၀ ရှိကြောင်းသိရသည်။

အလားတူ သြဂုတ် ၂၃ ရက်တွင် ဒဂုံမြို့နယ် မြို့မကျောင်းလမ်းမရှိ စိန်ရတနာ ဓမ္မာစရိယစာသင်တိုက်ရှိ သံဃာတော်များအား Eleven Media Group ၏ Chairman ဒေါက်တာသန်းထွဋ်အောင်နှင့်ဇနီး၊ ဝန်ထမ်းများက ၀ါဆိုသင်္ကန်းငါးစုံ၊ လှူဖွယ်ဝတ္ထုနှင့် နေ့ဆွမ်းဆက်ကပ်လှူဒါန်းခဲ့ကြောင်း၊ သြဂုတ် ၁၆ ရက်တွင် ဒဂုံမြို့သစ်မြောက်ပိုင်းမြို့နယ် အ မှတ် ၄၂ ရပ်ကွက် သခင်အုန်းဖေကြီးလမ်းရှိ ထေရဝါဒဓမ္မဘောဇနဆွမ်းစားကျောင်း၌ သံဃာတော်များအား ၀ါဆိုသင်္ကန်းငါးစုံ၊ လှူဖွယ်ဝတ္ထုနှင့် နေ့ဆွမ်းဆက်ကပ်လှူဒါန်းခဲ့ကြောင်း သိရသည်။

ထို့ပြင် သြဂုတ် ၆ ရက်ကလည်း သံဃာတော် ၃၇၀ ကျော် သီတင်းသုံးသည့် ဒဂုံမြို့သစ်တောင်ပိုင်းမြို့နယ်ရှိ ပိဋကသုံးပုံနိကာယ်စာသင်တိုက်မှ သံဃာတော်များအား ၀ါဆိုသင်္ကန်း၊ နေ့ဆွမ်းနှင့် နဝကမ္မဝတ္ထုတို့ကို လှူဒါန်းခဲ့ကြောင်းသိရသည်။

၀ါတွင်းကာလ၌ သံဃာတော်များအား ဆွမ်းကွမ်းအခက်အခဲမရှိစေရန် Eleven Media Group ဝန်ထမ်းများ စုပေါင်း၍ ပရိယတ္တိစာသင်တိုက်များမှ သံဃာတော်များအား ၀ါဆိုသင်္ကန်းနှင့် ဆွမ်းကို အပတ်စဉ်လှူဒါန်းမှုများ ပြုလုပ်မည်ဖြစ်သည်။