Top News

ဆီဗီလာအသင်းသည် ပြီးခဲ့သည့် စနေနေ့က ယှဉ်ပြိုင်ခဲ့သော လာလီဂါပွဲစဉ် (၃)တွင် တန်းတက်အယ်မယ်ရီယာအသင်းအား (၁-၂)ဂိုးဖြင့်ရှုံးနိမ့်ခဲ့ပြီးနောက် ရာသီအဖွင့် (၃)ပွဲဆက် နိုင်ပွဲပျောက်ဆုံးခြင်းဖြစ်ခဲ့ပြီး ၁၉၉၆-၉၇ ရာသီနောက်ပိုင်း အသင်း၏အဆိုးရွားဆုံး လာလီဂါရာသီအဖွင့်မှတ်တမ်းဖြစ်ခဲ့ကြောင်းသိရသည်။

ဆီဗီလာအသင်းသည် ယခုရာသီ လာလီဂါပြိုင်ပွဲတွင် ပွဲစဉ် (၁)၌ အိုဆာအူနာအသင်းအား (၁-၂)ဂိုးဖြင့်ရှုံး နိမ့်ခဲ့သလို၊ ပွဲစဉ် (၂)တွင် ဗယ်လာဒိုလစ်အသင်းနှင့် (၁-၁)ဂိုးသရေရလဒ် ကိုသာရရှိခဲ့သည်။ ထို့ကြောင့် ယခုပွဲစဉ် (၃)တွင် ရှုံးပွဲထပ်မံကြုံတွေ့ခဲ့ပြီးနောက် နှစ်ပေါင်း (၂၆)နှစ်ကျော်ကာလအတွင်း အသင်း၏ အဆိုးရွားဆုံး လာလီဂါရာသီ အဖွင့်မှတ်တမ်းကိုပိုင်ဆိုင်ခဲ့ခြင်းဖြစ်သည်။

ဆီဗီလာအသင်းသည် ၁၉၉၆-၉၇ ရာသီတွင် ရာသီအဖွင့်ပွဲစဉ် (၃)ပွဲကစားပြီးချိန်၌ (၁)ပွဲနိုင်၊ (၂)ပွဲရှုံးရလဒ်ကိုရရှိခဲ့ခြင်းဖြစ်ပြီး၊ ယခုရာသီတွင်မူ နိုင်ပွဲပင်မရရှိသေးရာ အသင်း၏ အဆိုးရွားဆုံးသော ရာသီအဖွင့်မှတ်တမ်းသစ်ဖြစ်လာခဲ့ကြောင်းသိရသည်။

ထို့ပြင် ဆီဗီလာအသင်းသည် အဆိုပါ ၁၉၉၆-၉၇ ရာသီတွင်  ရာသီကုန်ဆုံးချိန်၌ အဆင့် (၂၀)နေရာသာ ရရှိခဲ့ပြီး ဆီဂန်ဒါပြိုင်ပွဲသို့ တန်းဆင်းယှဉ်ပြိုင်ခဲ့ရရာ ယခုရာသီတွင်လည်း ယင်းကဲ့သို့  အခြေအနေဆိုးမျိုး ထပ်မံမကြုံတွေ့စေရန်အတွက်  လမ်းကြောင်းမှန်ပေါ် အ မြန်ဆုံးပြန်လည်တက်လှမ်းနိုင်ရန် လိုအပ်ကြောင်း စပိန်မီဒီယာများက သုံးသပ်ဖော်ပြခဲ့ကြသည်။

ဆီဗီလာအသင်းသည် ယခုနွေရာသီအပြောင်းအရွှေ့ကာလအတွင်း အသင်း၏ အဓိကနောက်ခံလူ (၂)ဦးဖြစ်သည့်ဒီယေဂိုကားလို့စ်နှင့် ခွန်ဒဲတို့အား တစ်ပြိုင်နက်ဆုံးရှုံးခဲ့ရသလို၊ အသင်းအနေဖြင့် ခံစစ်ပိုင်းအတွက် ထိုက်သင့်သည့် အစားထိုးမှုများ ပြန်လည်ပြုလုပ်နိုင်ခြင်း မရှိသည့်အတွက် ပရိသတ်များ၏ဝေဖန်မှုကို ခံနေရကြောင်းသိရသည်။ ဆီဗီလာအသင်းသည် လာမည့် လာလီဂါပွဲစဉ် (၄)တွင် ဘာစီလိုနာအသင်းအား အိမ်ကွင်းတွင်လက်ခံကစားရမည်ဖြစ်သည်။