Top News

အာဆင်နယ်တိုက်စစ်မှူး အူဘာမီယန်းက စပါးအသင်းနှင့်ကစားမည့် မြောက်လန်ဒန်ဒါဘီမှာ မိမိတို့အတွက် အလှည့်အပြောင်းဖြစ်လာမည်ဟု ပြောကြားခဲ့သည်။ 

အာဆင်နယ်အသင်းသည် ယခုရာသီ ယူရိုပါလိဂ်ပြိုင်ပွဲတွင် နောက်တစ်ဆင့်တက်ရောက်နိုင်ခဲ့သော်လည်း ပရီးမီးယားလိဂ်တွင် ရလဒ်များ ဆိုးရွားနေပြီး ပွဲစဉ် (၁၀)အပြီးတွင် ရမှတ် (၁၃)မှတ်သာ ရရှိထားကာ အဆင့် (၁၄)နေရာ၌ ရပ်တည်နေသည်။ 

ယင်းမှာ အသင်းသမိုင်းတွင် နောက်ဆုံး(၃၉)နှစ်အတွင်း အဆိုးရွားဆုံး ရာသီအစရလဒ်ဖြစ်ပြီး အူဘာမီယန်းက စပါးအသင်းကို အနိုင်ကစားကာ လမ်းကြောင်းမှန်ပေါ် ပြန်ရောက်ရန် ရည်မှန်းနေခြင်းဖြစ်သည်။ 

အူဘာမီယန်းက "စပါးအသင်းနဲ့ ကစားမယ့်ပွဲက ကျွန်တော်တို့အတွက် ဒီရာသီမှာ အလှည့်အပြောင်းဖြစ်လာနိုင်တဲ့ ပွဲစဉ်တစ်ပွဲ ဖြစ်ပါတယ်။ ဒီပွဲက ကျွန်တော်တို့ အခုရင်ဆိုင်နေရတဲ့ အခြေအနေတွေကို ပြောင်းလဲဖို့ အကောင်းဆုံးအခွင့်အရေးပါပဲ။ ကျွန်တော်တို့အနေနဲ့ စပါးအသင်းကို အနိုင်ရခဲ့မယ်ဆိုရင် စိတ်ပိုင်းဆိုင်ရာပါ ပြောင်းလဲသွားမှာပါ။ ဒါဘီပွဲရလဒ်က ကစားသမားတွေကိုရော၊ ပရိသတ်တွေကိုရော အားလုံးကို ပြောင်းလဲစေနိုင်ပါတယ်။ ကျွန်တော်တို့အနေနဲ့ စပါးအသင်းကို အနိုင်ရဖို့အတွက် အစွမ်းကုန်ကြိုးစားသွားမှာဖြစ်ပြီး လက်ရှိအခြေအနေကို ပြောင်းလဲသွားမှာပါ"ဟု ပြောကြားခဲ့သည်။ 

ပြီးခဲ့သည့် ၂၀၁၉-၂၀ ရာသီက အာဆင်နယ်အသင်းအတွက် ပြိုင်ပွဲစုံ (၂၉)ဂိုးအထိ သွင်းယူပေးခဲ့သည့် အူဘာမီယန်းသည် ယခုရာသီတွင် ပုံမှန်ခြေစွမ်းရရန် ရုန်းကန်နေရပြီး ပရီးမီးယားလိဂ် (၁၀)ပွဲတွင် (၂)ဂိုးသာ သွင်းယူထားနိုင်သေးသည်။ 

အာဆင်နယ်အသင်းသည် ပရီးမီးယားလိဂ်ပွဲစဉ် (၁၁)အဖြစ် မြောက်လန်ဒန်ဒါဘီပြိုင်ဘက် စပါးအသင်းကို အဝေးကွင်းတွင် သွားရောက်ယှဉ်ပြိုင်ရမည်ဖြစ်သည်။