Top News

မြန်မာနိုင်ငံဘောလုံးအဖွဲ့ချုပ် (MFF) သည် Asean Cup ပြိုင်ပွဲ အုပ်စု (B) အဖွင့်ပွဲ အဖြစ် ဒီဇင်ဘာ ၉ ရက်တွင် ရန်ကုန်မြို့၌ ယှဉ်ပြိုင်ကစားမည့် မြန်မာအသင်းနှင့် အင်ဒိုနီးရှားအသင်းတို့ပွဲအတွက် ကြိုတင်လက်မှတ်များ ရောင်းချမည်ဖြစ်ကြောင်း သိရသည်။

MFF သည် ကြိုတင်လက်မှတ်များကို ဒီဇင်ဘာ ၆ ရက်မှစတင်ကာ ရောင်းချပေးမည်ဖြစ်ပြီး MFF ရုံးတွင် နံနက် ၁၀ နာရီမှ ညနေ ၄ နာရီအထိ ရောင်းချမည်ဖြစ်သည်။ ပွဲကစားမည့်နေ့တွင်လည်း အထူးတန်းလက်မှတ်များ ကို သုဝဏ္ဏဘောလုံးကွင်း ဂိတ်-၂၊ ရိုးရိုးတန်း လက်မှတ်များကို သုဝဏ္ဏဘောလုံးကွင်း ဂိတ် -၈ တွင် ရောင်းချပေးမည်ဖြစ်သည်။ ကွင်းဝင်ကြေးအဖြစ် အထူးတန်းကျပ်ငါးထောင်၊ ရိုးရိုးတန်း ကျပ်နှစ်ထောင် သတ်မှတ်ထားသည်။ 

မြန်မာအသင်းနှင့် အင်ဒိုနီးရှားအသင်းတို့ပွဲကို ဒီဇင်ဘာ ၉ ရက် ည ၇ နာရီတွင် သုဝဏ္ဏကွင်း၌ ကျင်းပမည်ဖြစ်ပြီး ဘောလုံးပွဲအပြီးတွင် ပရိသတ်များ အပြန်ခရီးအဆင်ပြေစေရန် ဘတ်စ်ကားများ အခမဲ့စီစဉ်ပေးထားကြောင်း သိရသည်။ MFF သည် ပရိသတ်များ အပြန်အဆင်ပြေစေရန်နှင့် နီးစပ်ရာနေရာများသို့ရောက်ရှိစေရန် ဘတ်စ်ကားများ စီစဉ်ထားခြင်းဖြစ်ပြီး ပို့ဆောင်မည့်လမ်းကြောင်းကို ထပ်မံထုတ်ပြန်မည်ဖြစ်သည်။

မြန်မာ့လက်ရွေးစင်အသင်းသည် ယခု ကျင်းပမည့်  Asean Cup ပြိုင်ပွဲတွင် အုပ်စုလေးပွဲအနက် အင်ဒိုနီးရှား၊ လာအိုအသင်း တို့နှင့်ပွဲများကို အိမ်ကွင်းလက်ခံကစားရမည် ဖြစ်ပြီး အင်ဒိုနီးရှားနှင့်ပွဲကို ည ၇ နာရီမှ ကျင်းပမည်ဖြစ်သော်လည်း လာအိုအသင်းနှင့် ပွဲကိုမူ ဒီဇင်ဘာ ၁၈ ရက် ညနေ ၅ နာရီ တွင် ကျင်းပမည်ဖြစ်သည်။ 

မြန်မာနိုင်ငံဘောလုံးအဖွဲ့ချုပ်သည် ယခင်က မြန်မာ့လက်ရွေးစင် အသင်းနှင့် သက်တမ်းအလိုက် လူငယ်လက်ရွေးစင်အသင်းများ၏ နိုင်ငံတကာပြိုင်ပွဲများ၊ ခြေစစ်ပွဲများကို ရန်ကုန်နှင့် မန္တလေးမြို့၌ ကျင်းပခဲ့သော်လည်း ယခုနောက်ပိုင်းနှစ်များ တွင် ရန်ကုန်မြို့ရှိ သုဝဏ္ဏကွင်း၌သာ ကျင်းပလျက်ရှိသည်။

၂၀၂၄  Asean Cup ပြိုင်ပွဲကို အုပ်စု နှစ်ခုခွဲ၍ ကျင်းပမည်ဖြစ်ပြီး မြန်မာအသင်းသည် အုပ်စု (B) တွင် ဗီယက်နမ်၊ အင်ဒိုနီး ရှား၊ ဖိလစ်ပိုင်၊ လာအိုအသင်းတို့နှင့်အတူ ကျရောက်နေသည်။