Top News

ဘာစီလိုနာအသင်းသည် အသင်းတိုက်စစ်ကစားသမား ဂရီးဇ်မန်းကို ဂျူဗင်တပ်စ်တိုက်စစ်မှူး ဒီဘားလားနှင့် တိုက်ရိုက်အလဲအထပ်ပြုလုပ်ရန် စီစဉ်နေကြောင်း အီတလီအားကစားဝက်ဘ်ဆိုက်  Calciomercato က ဖော်ပြခဲ့သည်။ 

    

ဘာစီလိုနာအသင်းသည် ပြင်သစ်တိုက်စစ်ကစားသမား ဂရီးဇ်မန်း (၂၉ နှစ်)ကို ၂၀၁၉ နွေရာသီအပြောင်းအရွှေ့ကာလတွင် စာချုပ်လျော်ကြေး ယူရိုသန်း (၁၂၀)ဖြင့် ခေါ်ယူခဲ့သည်။ 

သို့သော် ဂရီးဇ်မန်းသည် ဘာစီလိုနာအသင်းတွင် ပုံမှန်ခြေစွမ်းပြနိုင်ခြင်းမရှိသဖြင့် ဝေဖန်မှုများရင်ဆိုင်နေရပြီး ၎င်းကို ရောင်းထုတ်ရန်တောင်းဆိုမှုများလည်း ရှိနေသည်။ 

ထို့ကြောင့် ဘာစီလိုနာအသင်းသည် ဂရီးဇ်မန်းကို ဂျူဗင်တပ်စ်အသင်းတိုက်စစ်မှူး ဒီဘားလားနှင့် တိုက်ရိုက်အလဲအထပ်ပြုလုပ်ရန် ဆန္ဒရှိနေကြောင်း သိရသည်။ 

    

ဂျူဗင်တပ်စ်အသင်းသည် ၂၀၂၂ ခုနှစ်တွင် အသင်းနှင့်စာချုပ်သက်တမ်းကုန်ဆုံးမည့် အာဂျင်တီးနားတိုက်စစ်မှူး ဒီဘားလားကို စာချုပ်သက်တမ်းတိုးရန် ဆန္ဒမရှိကြောင်း သိရသည်။ 

ထို့ကြောင့် ဂျူဗင်တပ်စ်အသင်းသည် ၂၀၂၂ ခုနှစ်တွင် ဒီဘားလားကို ပြောင်းရွှေ့ကြေးအလွတ်ဖြင့် လက်လွှတ်လိုခြင်းမရှိသည့်အတွက် ဘာစီလိုနာအသင်း၏ ကမ်းလှမ်းမှုကို လက်ခံဖွယ်ရှိနေကြောင်း သိရှိရသည်။ 

    

ဂျူဗင်တပ်စ်အသင်းသည် ပြီးခဲ့သည့် ၂၀၂၀ နွေရာသီအပြောင်းအရွှေ့ကာလတွင် ဘာစီလိုနာ ကွင်းလယ်လူ အာသာကို ယာနစ်အား အလိုက်ပေးခေါ်ယူခဲ့ဖူးသည်။ 

ထို့ကြောင့် လာမည့်နွေရာသီတွင် ဘာစီလိုနာတိုက်စစ်မှူး ဂရီးဇ်မန်းနှင့် ဂျူဗင်တပ်စ် တိုက်စစ်မှူး ဒီဘားလားတို့ အလဲအထပ်ပြုလုပ်မည့် အစီအစဉ်မှာ ဖြစ်မြောက်လာဖွယ်ရှိနေကြောင်း Calciomercato က ဖော်ပြခဲ့သည်။