Top News

တရုတ်နိုင်ငံခြားရေးဝန်ကြီးဝမ်ယိသည် ဇန်နဝါရီ ၂၇ ရက်က အမေရိကန်နိုင်ငံခြားရေးဝန်ကြီး အန်တိုနီဘလင်ကန်နှင့် စကားပြောခဲ့ရာ၌ အမေရိကန်အနေဖြင့် ဆောင်းရာသီအိုလံပစ်ပြိုင်ပွဲကို နှောင့်ယှက်နေခြင်းအား ရပ်တန့်ရန်ပြောကြားပြီး ဥရောပတွင် ရုရှား၏ လုံခြုံရေးစိုးရိမ်မှုများကို အလေးအနက်ထားသင့်သည်ဟု ပြောကြားခဲ့ကြောင်း သိရသည်။

တရုတ်က ဖေဖော်ဝါရီ ၄ ရက်တွင် လက်ခံကျင်းပမည့် ဆောင်းရာသီအိုလံပစ်ပြိုင်ပွဲကို ပါ၀ါအပျော့အောင်ပွဲအဖြစ် အသွင်ပြောင်းလဲမည်ဟု မျှော်လင့်လျက်ရှိသည်။

သို့ရာတွင် အထူးသဖြင့် ရှန်ကျန်းဒေသက လူနည်းစုဝီဂါမွတ်စလင်များနှင့် စပ်လျဉ်း၍တရုတ်၏ လူ့အခွင့်အရေးမှတ်တမ်းကို အမေရိကန်ဦးဆောင်ကာ သံတမန်ရေးသပိတ်မှောက်မှုက အိုလံပစ်ပြိုင်ပွဲမတိုင်မီ ပြင်ဆင်မှုများကို ဖုံးလွှမ်းနေခဲ့သည်။

“လတ်တလော အရေးအကြီးဆုံး ဦးစားပေးကိစ္စကတော့ အမေရိကန်အနေနဲ့ ပေကျင်းဆောင်းရာသီအိုလံပစ်ပြိုင်ပွဲကို နှောင့်ယှက်နေတာ ရပ်သင့်တယ်ဆိုတဲ့အချက်ဖြစ်ပါတယ်” ဟု အမေရိကန်နိုင်ငံခြားရေးဝန်ကြီး အန်တိုနီဘလင်ကန်နှင့် ဖုန်းပြောရာတွင် နိုင်ငံခြားရေးဝန်ကြီးဝမ်ယိက ပြောကြားခဲ့သည်ဟု တရုတ်နိုင်ငံခြားရေးဝန်ကြီးဌာနက၏ ထုတ်ပြန်ချက်အရ သိရသည်။

အမေရိကန်သည် ထိုင်ဝမ်ကိစ္စတွင် အန္တရာယ်ကို ဖိတ်ခေါ်နေခြင်းကိုလည်း ရပ်တန့်ရမည်ဟု ဝမ်ယိက ဖြည့်စွက်ပြောကြားခဲ့သည်ဟု ဆိုသည်။

နိုင်ငံခြားရေးဝန်ကြီးနှစ်ဦးသည် ယူကရိန်းနှင့် ပတ်သက်၍ ဥရောပ၌ တင်းမာမှုများ မြင့်တက်လာသည့်ကိစ္စကိုလည်း ဆွေးနွေးခဲ့ကြရာ ရုရှား၏လုံခြုံရေးစိုးရိမ်မှုများကို အလေးထားကြောင်း ဘလင်ကန်ကို ဝမ်ယိက ပြောကြားခဲ့သည်ဟု တရုတ်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဆက်လက် ဖော်ပြထားသည်။

"အားလုံးဟာ စစ်အေးခေတ်စိတ်ဓာတ်ကို လုံးဝစွန့်လွှတ်သင့်ပါတယ်။ စေ့စပ်ညှိနှိုင်းမှုကတစ်ဆင့် ဟန်ချက်ညီပြီး ထိရောက်၊ တည်တ့ံတဲ့ ဥရောပလုံခြုံရေးယန္တရားကို ထူထောင်သင့်ပါတယ်” ဟု ဝမ်ယိက ပြောကြားခဲ့သည်။

“ရုရှားရဲ့ကျိုးကြောင်းဆီလျော်တဲ့ လုံခြုံရေးစိုးရိမ်မှုတွေကို အလေးထားသင့်ပါတယ်။ ဖြေရှင်းသင့်ပါတယ်” ဟု တရုတ်နိုင်ငံခြားရေးဝန်ကြီးက ပြောကြားခဲ့သည်။

ဥရောပတွင် နေတိုးမဟာမိတ်အဖွဲ့ တိုးချဲ့ခြင်းနှင့် စပ်လျဉ်း၍ ရုရှား၏စိုးရိမ်မှုများကို ရည်ညွှန်းပြောဆိုရာ၌ ဝမ်ယိက “စစ်အုပ်စုကို အားကောင်းအောင်လုပ်ခြင်း ဒါမှမဟုတ် စစ်အုပ်စုတိုးချဲ့ခြင်းဖြင့် ဒေသဆိုင်ရာလုံခြုံရေးကို အာမခံချက်မပေးနိုင်” ဟု ပြောကြားခဲ့သည်။

ဝမ်ယိနှင့် ဘလင်ကန်တို့ ဖုန်းပြောခဲ့သည့်အကြောင်းကို အမေရိကန်နိုင်ငံခြားရေးဝန်ကြီးဌာနက ထုတ်ပြန်ရာတွင် အိုလံပစ်ကိစ္စကို ဖော်ပြခဲ့ခြင်းမရှိဘဲ ယူကရိန်းအရေးကို အလေးထားဆွေးနွေးခဲ့သည်ဟု ဖော်ပြခဲ့သည်။

“ယူကရိန်းကို ရုရှားရဲ့ထပ်မံကျူးကျော်မှုက ကမ္ဘာလုံးဆိုင်ရာလုံခြုံရေးနဲ့ စီးပွားရေးတို့ကို အားနည်းစေတယ်လို့ ဝန်ကြီး ဘလင်ကန်က ပြောကြားခဲ့ပါတယ်။ ဒါ့အပြင် အရှိန်လျှော့ချရေးနဲ့ သံတမန်ရေးတို့ဟာ ရှေ့ဆက်သွားရမည့် နည်းလမ်းတွေဖြစ်တယ်လို့ ပြောခဲ့ပါတယ်” ဟု အမေရိကန်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဆက်လက်ဖော်ပြထားသည်။

ယူကရိန်းကို ရုရှားက ကျူးကျော်မည့် အလားအလာနှင့်ပတ်သက်၍ တစ်ကမ္ဘာလုံး စိုးရိမ်မှုများ မြင့်တက်နေသည်။