Top News

ကိုရိုနာဗိုင်းရပ်စ် ကူးစက်မှုသည် တရုတ်တွင် သိသိသာသာ ကျဆင်းသွားခဲ့သော်လည်း မတ် ၃ ရက်က အမေရိကန်တွင် သေဆုံးသူ ခြောက်ဦးအထိရှိလာခဲ့ပြီး ကမ္ဘာသည် ဗိုင်းရပ်စ်နှိမ်နင်းရေးစစ်ပွဲ နယ်မြေသစ်သို့ ချဉ်းနင်းဝင်ရောက်နေကြောင်း ကမ္ဘာ့ကျန်းမာရေးအဖွဲ့ WHO က သတိပေးခဲ့သည်။

ယင်းဗိုင်းရပ်စ်ကြောင့် ကမ္ဘာတစ်ဝန်း တွင် ၃၁၀၀ ကျော် သေဆုံးထားပြီး ၉၀၀၀၀ ကျော် ကူးစက်ခံထားရသည်။ တရုတ်နိုင်ငံ ပြင်ပတွင် ဗိုင်းရပ်စ်ကူးစက်ခံရမှုသည် တရုတ်နိုင်ငံတွင်း၌ ကူးစက်ခံရမှုထက် ကိုးဆကျော် မြင့်မားခဲ့သဖြင့် ဗိုင်းရပ်စ်အကျပ်အတည်းသည် သိသာသော အပြောင်းအလဲဖြစ်လာခဲ့သည်ဟု WHO က ဆိုခဲ့သည်။

တရုတ်သည် ဗိုင်းရပ်စ်ကူးစက်ပျံ့နှံ့မှု ကို ထိန်းချုပ်ရန် ကြိုးပမ်းသည့်အနေနှင့် သန်းဆယ်ချီသော လူများအား သီတင်းပတ်များစွာ ပိတ်ဆို့ ထိန်းချုပ်ခဲ့မှုက အကျိုးရလဒ်ကောင်းကို ထွက်ပေါ်စေခဲ့ဖွယ်ရှိသည်။ တရုတ်တွင် ဗိုင်းရပ်စ်ကူးစက်ခံရမှု  သိသိသာသာ ကျဆင်းနေသည်မှာ ရက်များစွာ ရှိလာခဲ့သည်။

အီတလီက မြို့များကို ပိတ်ဆို့ခဲ့ပြီး အခြားနိုင်ငံများက လူစုလူဝေးများကို ရှောင်ကြဉ်ခြင်း၊ ဗိုင်းရပ်စ် ကူးစက်မှု ဖြစ်ပွားနေသော နိုင်ငံများမှ ခရီးသွားများကို တားမြစ်ခြင်းတို့ ဆောင်ရွက်ခဲ့ကြသည်။

တောင်ကိုရီးယား၊ အီတလီ၊ အီရန်တို့သည် COVID- 19 ဗိုင်းရပ်စ် အဓိက ကူးစက်သည့်နိုင်ငံများ ဖြစ်လာခဲ့သည်။ မတ် ၃ က ထပ်မံကူးစက်ခံရသူ ၈၅၁ ဦး ရှိခဲ့ပြီး နှစ်ဦးထပ်မံသေဆုံးခဲ့သော တောင်ကိုရီးယားသည် ကူးစက်ခံရသူ ၅၀၀၀ ကျော်နှင့် သေဆုံး သူ ၂၈ ဦးထိ ရှိခဲ့သဖြင့် တရုတ်ပြင်ပတွင် ဗိုင်းရပ်စ်ကူးစက်မှု အဆိုးဆုံးနေရာ ဖြစ်ခဲ့သည်။

တရုတ်တွင် မတ် ၃ က ဗိုင်းရပ်စ် ထပ်မံကူးစက်ခံရသူ ၁၂၅ ဦး ရှိခဲ့ပြီး တစ်လခွဲအတွင်း နေ့စဉ်ကူးစက်မှု အနိမ့်ဆုံးဖြစ်ခဲ့သည်။ ဗိုင်းရပ်စ်ကြောင့် ဟူပေပြည်နယ်တွင် ၃၁ ဦး ထပ်မံသေဆုံးခဲ့ပြီးနောက် တရုတ်နိုင်ငံတစ်ဝန်းတွင် သေဆုံးသူ ၂၉၄၃ ဦးအထိ ရှိခဲ့သည်။

ပေကျင်း၊ ရှန်ဟိုင်း၊ ကွမ်တုံ ပြည်နယ်များသည် ဗိုင်းရပ်စ်ကူးစက်မှု ဆိုးရွားသည့် နိုင်ငံများမှ ရောက်လာသူများကို ၁၄ ရက်ကြာ သီးခြားခွဲထားစောင့်ကြည့်မည် ဖြစ်ကြောင်း ပြဋ္ဌာန်းခဲ့သည်။

ဗိုင်းရပ်စ်ကြောင့် ကမ္ဘာ့စီးပွားရေး ထိခိုက်မှုကို စိုးရိမ်မှု ကြီးမားလာခဲ့သဖြင့် ဂျီ-၇ ဘဏ္ဍာရေးဝန်ကြီးများနှင့် ဗဟိုဘဏ် ဥက္ကဋ္ဌများသည် မတ် ၃ တွင် အစည်းအဝေး ကျင်းပခဲ့ကြသည်။ ယူရိုဇုန်ဘဏ္ဍာရေးဝန်ကြီးများက  မတ် ၄ တွင် ဖုန်းကွန်ဖရင့် ပြုလုပ်ရန် စီစဉ်ထားသည်။

“ကျွန်တော်တို့ဟာ မကြုံဖူးသေးတဲ့ အခြေအနေတစ်ရပ်ကို ကြုံနေရပါပြီ” ဟု ကမ္ဘာ့ကျန်းမာရေးအဖွဲ့ ဥက္ကဋ္ဌ တေဒရိုအာဒါနန် ဂီဘရီရေဆုက မတ် ၂ တွင် ပြောကြားခဲ့သည်။ ဗိုင်းရပ်စ်ကူးစက်ပျံ့နှံ့နေသော နယ်မြေမှ ရောက်ရှိခြင်းမျိုး မဟုတ်ဘဲ အခြားတစ်နေရာတွင် ဗိုင်းရပ်စ်ကူးစက်ပျံ့နှ့ံနေမှုကို ယခင်က မကြုံဖူးကြောင်း ၎င်းက ပြောကြားခဲ့သည်။

အမေရိကန်တွင် ၀ါရှင်တန်အနောက်မြောက်ပိုင်း၌ ခြောက်ဦးမြောက် သေဆုံးမှု ရှိလာခဲ့ပြီးနောက် ဗိုင်းရပ်စ် နှိမ်နင်းရေး စစ်ပွဲသည် ထိန်းချုပ်ရေးမှ လျော့ပါးရေးသို့ ပြောင်းလဲခဲ့ပြီဖြစ်ကြောင်း တာဝန်ရှိသူများက သတိပေးခဲ့သည်။

သေဆုံးသူများအနက် ငါးဦးသည် လူနှစ်သန်းကျော် နေထိုင်သော ကင်းကောင်တီမှဖြစ်ပြီး ကူးသန်းရောင်းဝယ်ရေးနှင့် သယ်ယူပို့ဆောင်ရေး ဗဟိုချက် ဆီယက်တယ်မြို့ရှိသည့် ဒေသဖြစ်သည်။

အမေရိကန်ဒုတိယ သမ္မတ မိုက်ပင့်စ်က ဗိုင်းရပ်စ်ကုသမှုအတွက် ဆေးသည် ယခု နွေရာသီ သို့မဟုတ် ဆောင်းဦးတွင် ရနိုင်ကြောင်း ပြောကြားခဲ့သည်။

အမေရိကန်တွင် လူနာတစ်ဦးကို ကုသခဲ့သော Remdesivir ဆေးကို မိုက်ပင့်စ်က ရည်ညွန်းပြောကြားခဲ့ခြင်း ဖြစ်သည်။ ဆေးထုတ်လုပ်ရေးကုမ္ပဏီကြီး Gilead က စမ်းသပ်နေသော ယင်းဆေးကို အာရှတွင် နောက်ထပ်စမ်းသပ်မှုနှစ်ကြိမ် ဆောင်ရွက်နေသည်။

ဗိုင်းရပ်စ်တိုက်ဖျက်ရေးအတွက် အမေရိကန်ဆေးထုတ်လုပ်ရေးကုမ္ပဏီများ ပူးပေါင်းခဲ့ကြောင်းနှင့် တောင်ကိုရီးယားနှင့် အီတလီတို့သည် အမေရိကန်သို့ သွားမည့် လေကြောင်းခရီးသည်အားလုံးကို စစ်ဆေးမည်ဖြစ်ကြောင်းလည်း မိုက်ပင့်စ်က ကြေညာခဲ့သည်။

အမေရိကန်သည် ကမ္ဘာ့အဆင့် ဆေးရုံများနှင့် နောက်ဆုံးပေါ် သုတေသန စမ်းသပ်မှုများ ပိုင်ဆိုင်ထားသော်လည်း ကျန်းမာရေးစောင့်ရှောက်မှုကို မရနိုင်သော လူဦးရေ ၂၈ သန်း နီးပါးရှိမှုကြောင့် ဗိုင်းရပ်စ်ကူးစက်မှုကို ခံနိုင်ရည် နည်းနိုင်ကြောင်း သတ်မှတ်ခံ ထားရသည်။

ဗိုင်းရပ်စ်တိုက်ဖျက်ရေးတွင် တိုးတက်မှုများရှိကြောင်း တရုတ်တာဝန်ရှိသူများက ပြောကြားခဲ့ပြီး ပြည်နယ် ၁၉ ပြည်နယ်တွင် ပြည်နယ်အချင်းချင်း ဆက်သွယ်ပြေးဆွဲမှုကို မတ် ၁ က ပြန်လည်စတင်ခဲ့ကြောင်း အစိုးရမီဒီယာက ပြောကြားခဲ့သည်။