Top News

ပဲခူးတိုင်းဒေသကြီး ဝေါမြို့နယ် ရန်ကုန် - မော်လမြိုင်ကားလမ်း‌ရှိ ညောင်ခါးရှည် X - Ray ဂိတ်တွင် သံတိုသံစများတင်ဆောင်လာသည့် DYNA အမျိုးအစား (၆) ဘီးယာဉ်ပေါ်မှ ICE, WY, Happy Water အစရှိသော မူးယစ်ဆေးဝါးမျိုးစုံ ဖမ်းဆီးရမိခဲ့ကြောင်း သတင်းရရှိသည်။

ပြီးခဲ့သည့် ဒီဇင်ဘာလ (၁၉) ရက်က တောင်ကြီးမြို့ဘက်မှ မော်လမြိုင်မြို့ဘက်သို့မောင်းနှင်းလာသော သံတို၊သံစများတင်ဆောင်လာသည့် TOYOTA DYNAအမျိုးအစား (၆) ဘီးယာဉ်အား ညောင်ခါးရှည်စစ်ဆေးရေးဂိတ်တွင် X - Ray စက်ဖြင့် ပုံရိပ်ဖော်စစ်ဆေးရာ သံတို၊သံစများအောက်မှ သံသေတ္တာ (၆) လုံးဖြင့်သိုဝှက်သယ်ဆောင်လာသည့် မူးယစ်ဆေးဝါးများ ရှာဖွေတွေ့ရှိ ဖမ်းဆီးရမိခဲ့ခြင်းဖြစ်သည်။

ထို သံသေတ္တာများအနက် သံသေတ္တာ (၄) လုံးအတွင်းမှ စိတ်ကြွရူးသွပ်ဆေးပြား (၄၄၈၀၀၀၀) ပြား၊ နောက်ထပ် သံသေတ္တာတစ်လုံးအတွင်းမှ စိတ်ကြွရူးသွပ်ဆေးပြား (၇၅၀၀၀) ပြားအားရှာဖွေတွေ့ရှိခဲ့ခြင်းဖြစ်သည်။

ထို့အပြင် နောက်ထပ် သံသေတ္တာ (၁) လုံးအတွင်းမှ  ICE (မက်အဖီတမင်း) ဟုယူဆရသော အဖြူရောင်ပုံဆောင်ခဲ (၁) ထုပ်လျှင် (၁) ကီလိုဂရမ်ခန့်ပါ အထုပ်ကြီး(၃၀) ထုပ်၊၊ Happy Watဟုယူဆရသော အညိုရောင်အမှုန့် (၁)ထုပ်လျှင်(၁၀)ဂရမ်ခန့်စီပါ (၂၇) ထုပ်၊ (၁) ထုပ်လျှင် (၂၅) ဂရမ်ခန့်ပါ အညိုရောင်အမှုန့်ထုပ်(၉၆)ထုပ်နှင့် နောက်ထပ် သံသေတ္တာတစ်လုံးအတွင်းမှ ICE (မက်အဖီတမင်း) ဟုယူဆရသော အဖြူရောင်ပုံဆောင်ခဲ (၁) ထုပ်လျှင် (၁) ကီလိုဂရမ်ခန့်ပါ အထုပ်ကြီး (၁၄၀) ထုပ်အားတွေ့ရှိသိမ်းဆည်းရမိခဲ့သည်။

"ညောင်ခါးရှည်  X - Ray စစ်ဆေးရေးဂိတ်မှာ ဖမ်းဆိးရမိခဲ့တဲ့ မူးယစ်ဆေးဝါးတွေနဲ့ ပတ်သက်လို့ စုံစမ်းစစ်ဆေးမှုတွေ လုပ်ဆောင်နေဆဲလို့ သိရပါတယ်" ဟု လုံခြုံရေးတပ်ဖွဲ့နှင့် နီးစပ်သူတစ်ဦးကပြောကြားသည်။

 အဆိုပါ မူးယစ်ဆေးဝါးများ ရှာဖွေတွေ့ရှိမှုကြောင့် အမှုနှင့်ပတ်သက်သည့် တရားခံများနှင့် ကွင်းဆက်တရားခံများအား စုံစမ်းဖမ်းဆီးစစ်ဆေးပြီး အမှု့ဖွင့်အရေးယူဆောင်ရွက်လျှက်ရှိကြောင်းသိရသည်။