Top News

ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်ရှိ ရထားသံလမ်းတစ်ခု နံဘေးတွင် အမျိုးသား သုံးဦး အရက်အတူသောက်ရာမှ စကားများရန်ဖြစ်ပြီး လူသတ်မှုဖြစ်ပွားခဲ့ကြောင်း ဧပြီ ၂၂ ရက်တွင် ပြည်ထဲရေးဝန်ကြီးဌာနမှ သိရသည်။

ဖြစ်စဉ်မှာ သင်္ဃန်းကျွန်းမြို့နယ် (င/က) ရပ်ကွက်၊ သင်္ဃန်းကျွန်းဘူတာနှင့် ငမိုးရိပ်ဘူတာကြား မိုင်တိုင် (၄/၂၀-၂၁) ရှိ ရထားသံလမ်းပေါ်တွင် ဧပြီ ၂၀ ရက် နံနက် ၆ နာရီ ၁၀ မိနစ်ခန့်က အမျိုးသားတစ်ဦး ဒဏ်ရာများဖြင့် သေဆုံးနေကြောင်း သိရသဖြင့် သက်ဆိုင်ရာ တာဝန်ရှိသူများမှ သွားရောက်ကြည့်ရှု စစ်ဆေးခဲ့ကြောင်း၊ စစ်ဆေးရာ သေဆုံးသူမှာ ကို..... (၃၅ နှစ်) ဆိုသူဖြစ်ကြောင်း ပြည်ထဲရေးဝန်ကြီးဌာန မြန်မာနိုင်ငံရဲတပ်ဖွဲ့မှ သိရသည်။

ယင်းနောက် တာဝန်ရှိသူများမှ ဆက်လက်စုံစမ်းရာ ကို..... (၃၅ နှစ်) မှာ ဧပြီ ၁၉ ရက် ည ၁၁ နာရီခန့်က အဆိုပါ ရထားသံလမ်းအနီးတွင် မျိုးမင်းထိုက် (ခ) အဒူကရင်၊ မျိုးဇော် (ခ) ဟာမစ်ဆိုသူတို့နှင့်အတူ အရက်သောက်ခဲ့ကြောင်း၊ ထိုသို့ ၀ိုင်းဖွဲ့၍ အရက်သောက်စားနေစဉ် စကားများရန်ဖြစ်ရာမှ မျိုးမင်းထိုက် (ခ) အဒူကရင်၊ မျိုးဇော် (ခ) ဟာမစ်ဆိုသူတို့က ကို..... (၃၅) နှစ်အား ကျောက်ခဲဖြင့်ထု၍ သတ်ကာ ရထားသံလမ်းပေါ်သို့ တင်ထားခဲ့ခြင်းဖြစ်ကြောင်း ပြည်ထဲရေးဝန်ကြီးဌာန၏ ထုတ်ပြန်ချက်အရ သိရသည်။

အဆိုပါဖြစ်စဉ်မှ ကျူးလွန်သူ မျိုးမင်းထိုက် (ခ) အဒူကရင် (၄၀ နှစ်) နှင့် မျိုးဇော် (ခ) ဟာမစ် (၃၁ နှစ်) တို့နှစ်ဦးအား သင်္ဃန်းကျွန်းမြို့နယ် သုဝဏ္ဏနယ်မြေရဲစခန်းမှ (ပ) ၄၇၂/၂၀၂၀၊ ရာဇသတ်ကြီးပုဒ်မ ၃၀၂/၁၁၄ (လူသတ်မှု/အားပေးကူညီမှု) တို့ဖြင့် အမှုဖွင့်ကာ ဖမ်းဆီးထားကြောင်း ပြည်ထဲရေးဝန်ကြီးဌာန၏ ထုတ်ပြန်ချက်အရ သိရသည်။