Top News

ရီးယဲလ်အသင်းသည် ပြီးခဲ့သည့် နွေရာသီအ ပြောင်းအရွှေ့ကာလတွင် PSG အသင်းမှ ပြင်သစ်တိုက်စစ်မှူး ဘာပေကို ခေါ်ယူနိုင်ခြင်း မရှိခဲ့သော်လည်း လာမည့်နွေရာသီတွင် လက်မှတ်ထိုးကြေး ယူရိုသန်း(၈၀)အထိပေး၍ ခေါ်ယူရန် စီစဉ်ထား ကြောင်း သိရသည်။

ရီးယဲလ်အသင်းသည် ဘာပေကို အသင်း၏ အနာဂတ်ကစားသမားအဖြစ် ရည်ရွယ်ထားခြင်းကြောင့် ပြီးခဲ့သည့်နွေရာသီအပြောင်းအရွှေ့ ပိတ်သိမ်းခါနီးတွင် ယူရိုသန်း(၂၀၀)အထိ အသုံးပြု၍ ခေါ်ယူရန် ကြိုးပမ်းခဲ့သည်။

သို့သော် PSG အသင်းက လက်မခံခဲ့သဖြင့် အပြောင်းအရွှေ့ဖြစ်မြောက်ခြင်းမရှိဘဲ လာမည့်ဇန်နဝါရီအပြောင်းအရွှေ့ကာလမှသာ ကြိုတင်သဘောတူညီမှု ရယူနိုင်ရန် ကြိုးပမ်းရမည်ဖြစ်သည်။

ယင်းအခြေအနေမှာ ပြိုင်ဘက်အသင်းများအတွက်လည်း အခွင့်အရေးတစ်ရပ်ဖြစ်နေပြီး ပြောင်းရွှေ့ကြေးအလွတ်ဖြင့် ခေါ်ယူနိုင်မည့် ဘာပေကို အပြိုင်အဆိုင်ကြိုးပမ်းဖွယ်ရှိနေခြင်းကြောင့် ရီးယဲလ်အသင်းက မြင့်မားသည့် လက်မှတ်ထိုးကြေးပေး၍ မလွတ်တမ်းခေါ်ယူနိုင်ရန် ရည်ရွယ်နေခြင်းဖြစ်ကြောင်းလည်း Marca က သုံးသပ်ဖော်ပြခဲ့သည်။

ထို့ပြင် Marca က ဘာပေသည် လာမည့်နွေရာသီ၌ PSG အသင်းမှ ပြောင်းရွှေ့ကြေးအလွတ်ဖြင့် ထွက်ခွာခွင့်ရမည့် ကစားသမားဟု သတ်မှတ်ထားကြသော်လည်း ၎င်း၏ခြေစွမ်း၊ အသက်အရွယ်၊ အနာဂတ်အလားအလာတို့ကြောင့် မည်သည့်အသင်းမဆို လက်မှတ်ထိုးကြေး မြင့်မားစွာ ပေးရလိမ့်မည်ဖြစ်ပြီး ယင်းအတွက် ရီးယဲလ်အသင်းက ကြိုတင်စီစဉ်ထားပြီးဖြစ်ကြောင်း ဖော်ပြခဲ့သည်။

သို့သော် ပြီးခဲ့သည့် နွေရာသီတွင် ယူရိုသန်း(၂၀၀)ဖြင့်ပင် ခေါ်ယူနိုင်ခြင်း မရှိခဲ့သည့် ကစားသမားကို ယူရိုသန်း(၈၀)ဖြင့် ခေါ်ယူနိုင်မည်ဆိုလျှင်လည်း ကျေနပ်စရာဖြစ်သည်ဟု သုံးသပ်ခဲ့သည်။

ဘာပေသည် အခြားအသင်းများထက် ရီးယဲလ်အသင်းထံ ပြောင်းရွှေ့ရန်သာ စိတ်အားထက်သန်နေသူဖြစ်ကြောင်းလည်း သိရသည်။