Top News

ဟောင်ကောင်တွင် အစိုးရအဖွဲ့ကို အကြည်ညိုပျက်စေသည့် သတင်းများထုတ်လွှင့်ရန် ပူးပေါင်းကြံစည်မှုဖြင့် လူခြောက်ဦးကို ဖမ်းဆီးခဲ့ပြီးနောက် ဒီဇင်ဘာ ၂၉ ရက်တွင် ရဲတပ်ဖွဲ့က အွန်လိုင်းမှသတင်းများ ဖော်ပြနေသည့် ဒီမိုကရေစီလိုလားသည့် သတင်းမီဒီယာတစ်ခု၏ ရုံးခန်းကို ဝင်ရောက်စီးနင်းခဲ့ပြီး ယင်းသည် ဟောင်ကောင်၌ အစိုးရနှင့် သဘောထားကွဲလွဲသူများကို ဖိနှိပ်သည့် နောက်ဆုံးလှုပ်ရှားမှုတစ်ခု ဖြစ်ခဲ့သည်။

ဟောင်ကောင်တွင် ယခုနှစ်အစောပိုင်းက ဒီမိုကရေစီလိုလားသည့် Apple Daily သတင်းစာ ထုတ်ဝေမှုရပ်ဆိုင်းခဲ့ပြီးနောက် ရဲတပ်ဖွဲ့သည် ဟောင်ကောင်၏ ဒီမိုကရေစီလိုလားသည့် အထင်ကရ သတင်းမီဒီယာများထဲတွင် တစ်ခုအပါအဝင်ဖြစ်သည့် Stand News သတင်းမီဒီယာကို ဝင်ရောက်စီးနင်း ခဲ့ခြင်းဖြစ်ပြီး ဖမ်းဆီးခံခဲ့ရသူများသည် ယင်းမီဒီယာနှင့် ဆက်နွှယ်မှုရှိသူများဖြစ်သည်။

စီးနင်းရှာဖွေမှုတွင် အရာရှိ ၂၀၀ ကျော် ပါဝင်ခဲ့သည်ဟု ရဲတပ်ဖွဲ့က ပြောကြားခဲ့သည်။ ၎င်းတို့တွင် ပြီးခဲ့သည့်နှစ်က ပြဋ္ဌာန်းခဲ့သည့် တရုတ်၏အမျိုးသားလုံခြုံရေးဥပဒေအရ  သတင်းမီဒီယာနှင့်သက်ဆိုင်သည့် စီးနင်းရှာဖွေခွင့် ဝရန်းပါရှိကြောင်း ရဲတပ်ဖွဲ့က ဆိုသည်။

ဒီဇင်ဘာ ၂၉ ရက် အစောပိုင်းက ဖမ်းဆီးခံခဲ့ရသူ ခြောက်ဦးသည် ကိုလီနီခေတ်က ဥပဒေဖြစ်သည့် အစိုးရကို အကြည်ညိုပျက်စေသည့် အကြောင်းအရာများ ရေးသားဖော်ပြရန် ပူးပေါင်းကြံစည်မှုဥပဒေဖြင့် ဖမ်းဆီးခံ ခဲ့ရခြင်းဖြစ်ပြီး ၎င်းတို့၏ နေအိမ်များကိုလည်း ရှာဖွေမှုများလုပ်ဆောင်နေသည်ဟု ရဲတပ်ဖွဲ့က ပြောကြားခဲ့သည်။

၎င်းတို့အနေဖြင့် ပြစ်မှုထင်ရှားစီရင်ခံရမည်ဆိုပါက ထောင်ဒဏ်နှစ်နှစ်နှင့် ငွေဒဏ် ဒေါ်လာ ၆၄၀ ချမှတ်ခံရဖွယ်ရှိသည်။

ဖမ်းဆီးခံရသူ ခြောက်ဦးအနက် တစ်ဦးမှာ Stand News သတင်းမီဒီယာတွင် လက်ရှှိလုပ်ကိုင်နေသည့် အယ်ဒီတာတစ်ဦးဖြစ်ပြီး နောက်တစ်ဦးမှာ အယ်ဒီတာဟောင်းဖြစ်သည်ဟု South China Morning Post သ တင်းစာတွင်ဖော်ပြခဲ့သည်။

ကျန်လေးဦးမှာ အဆိုတော်နှင့် တက်ကြွလှုပ်ရှားသူဖြစ်သည့် ဒန်းနိစ်ဟိုနှင့် လွှတ်တော်အမတ်ဟောင်း မာဂရက် အန်တို့အပါအဝင် Stand News ၏ ဘုတ်အဖွဲ့ဝင်ဟောင်းများဖြစ်သည်ဟု ယင်းသတင်းစာတွင် ဖော်ပြခဲ့သည်။

ဒီဇင်ဘာ ၂၉ ရက် မနက်ပိုင်းက ဟို၏ Facebook အကောင့်တွင် ၎င်းဖမ်းဆီးခံခဲ့ရသည့်အကြောင်းကို အတည်ပြုဖော်ပြခဲ့သည်။ ၎င်း၏အကောင့်တွင် ၎င်းကိုယ်စားတင်ပေးခဲ့သည့် နောက်ဆက်တွဲ မက်ဆေ့ချ်တစ်ခုတွင် ဟိုသည် အဆင်ပြေကြောင်းနှင့် မိတ်ဆွေများနှင့် ထောက်ခံသူများကို စိတ်မပူရန် တိုက် တွန်းဖော်ပြခဲ့သည်။

ဒီဇင်ဘာ ၂၉ ရက်မနက်အစောပိုင်း၌ Facebook ပေါ်တွင်တင်ခဲ့သည့် Stand News မီဒီယာ၏ ဗီဒီယိုထဲတွင် ရဲအရာရှိများသည် လက်ထောက်အယ်ဒီတာ ရိုဆန်ချန်း၏ နေအမ်ကို ဝင်ရောက်ခဲ့ပုံကို ဖော်ပြခဲ့သည်။ ဟောင်ကောင်ဂျာနယ်လစ်များအသင်း (HKJA) ၏ ဥက္ကဋ္ဌဖြစ်သူ ချန်းကို  စစ်ဆေးမေးမြန်းရန် ရဲတပ်ဖွဲ့က ခေါ်ဆောင်သွားခဲ့သည်ဟု Stand News ကဖော်ပြခဲ့သည်။

ချန်းသည် မကြာမီအချိန်အတွင်း ပြန်လည်လွတ်မြောက်လာခဲ့ပြီး ၎င်း၏ လျှပ်စစ်ပစ္စည်းများ၊ ဘဏ်ကဒ်များနှင့် သတင်းမီဒီယာကဒ်ကို ရဲတပ်ဖွဲ့က သိမ်းယူခဲ့သည်ဟု မီဒီယာတစ်ခုကို ပြောကြားခဲ့သည်။