Top News

အရှေ့မြေထဲပင်လယ်ဒေသတွင် စွမ်းအင်ရင်းမြစ်များအတွက် တင်းမာမှုမြင့်တက် နေချိန်တွင် ဂရိက ၎င်း၏လက်နက်ကိုင်တပ်ဖွဲ့အား အဆင့်မြှင့်တင်ရန်အတွက် ပြင်သစ်နှင့် အခြားနိုင်ငံများထံမှ လက်နက်များဝယ်ယူရန် ဆွေးနွေးနေကြောင်း အစိုးရသတင်းရင်းမြစ်တစ်ဦးက စက်တင်ဘာ ၁ တွင် ပြောကြားခဲ့သည်။

ကာကွယ်ရေးအသုံးစရိတ်အား နှစ်ပေါင်းများစွာ လျှော့ချထားခဲ့ပြီးနောက် ဂရိသည် ၎င်း၏ အဟန့်အတားအင်အားစုအား တိုးမြှင့်ရန် အကူအညီဖြစ်စေမည့် လက်နက်များနှင့် အခြားအရာများကို ဝယ်ယူရန်အတွက် အရန်ငွေကြေးများ၏ တစ်စိတ်တစ်ပိုင်းကို သုံးစွဲရန် အဆင်သင့်ရှိနေကြောင်း ဘဏ္ဍာရေးဝန်ကြီးက သြဂုတ် ၃၁ တွင် ပြောကြားခဲ့သည်။

ဂရိ၏ ကာကွယ်ရေးစွမ်းပကားကို မြှင့်တင်ရန်အတွက် လက်ရှိမူဘောင်အရ လေယာဉ်များဝယ်ယူမှုလည်း ပါဝင်သည့် အကြောင်းအရာများကို ဆွေးနွေးနေကြောင်း အစိုးရတာဝန်ရှိသူတစ်ဦးက ပြောကြားခဲ့သော်လည်း အပြီးသတ်ဆုံးဖြတ်ချက် မချရသေးကြောင်း ပြောကြားခဲ့သည်။

အေသင်သည် ပြင်သစ်ထံမှ Dassault ထုတ်ရာ ဖေးတိုက်လေယာဉ် ၁၈ စင်း ဝယ်ယူရန်အတွက် သဘောတူခဲ့ကြောင်း ဂရိမီဒီယာများက သြဂုတ် ၃၁ ၌ ဖော်ပြခဲ့သည်။

၎င်းတို့၏ ကမ်းဦးရေတိမ်ပိုင်းနှင့်ပတ်သက်၍ ကွဲလွဲသော ထုတ်ပြန်မှုများကို အခြေခံ၍ ဒေသတွင်း သဘာဝဓာတ်ငွေ့ရင်းမြစ်များအား ပိုင်ဆိုင်ကြောင်း အပြိုင်အဆိုင် အခိုင်အမာထုတ်ပြန်မှုများအပါအဝင် ကိစ္စရပ်များစွာတွင် ဂရိသည် အိမ်နီးချင်း တူရကီနှင့် သဘောထားကွဲလွဲနေခဲ့သည်။

အေသင်နှင့် ကိုင်ရိုတို့က ရေကြောင်း နယ်နိမိတ်များအား အတည်ပြုသည့် သဘောတူညီချက် ရရှိခဲ့ပြီးနောက် ပိုင်ဆိုင်မှုအငြင်းပွား ဒေသတစ်ခုသို့ အင်ကာရာက လေ့လာရေးသုတေသနသင်္ဘော Oruc Reis အား စေလွှတ်ခဲ့အပြီး ပြီးခဲ့သောလတွင် ဂရိနှင့် တူရကီတို့အကြား တင်းမာမှုမြင့်တက်ခဲ့သည်။

ဂရိဝန်ကြီးချုပ် Kyriako Mitsotakis က အမေရိကန်သမ္မတ ဒေါ်နယ်ထရန့်နှင့် ပြီးခဲ့သောသီတင်းပတ်တွင် ဖုန်းဖြင့်ဆွေးနွေးခဲ့ချိန်၌ ပြင်သစ်နှင့် ဂျာမနီတို့က ထိုတင်းမာမှု ပြေလျော့စေရန် ကြားဝင်ညှိနှိုင်းခဲ့သည်။   အင်ကာရာနှင့် ညှိနှိုင်းဆွေးနွေးရန်အတွက် ဥရောပသမဂ္ဂက တိုက်တွန်းခဲ့ပြီးနောက် တူရကီက Oruc Reis သုတေသနရေယာဉ်၏ မစ်ရှင်အား စက်တင်ဘာ ၁၂ အထိ တိုးမြှင့်ကြောင်း သြဂုတ် ၃၁ တွင် ထုတ်ပြန်ခဲ့သည်။

တူရကီ၏ ထိုလုပ်ရပ်သည် တရားမဝင်ဖြစ်ပြီး ဒေသတွင်း လုံခြုံရေးနှင့် တည်ငြိမ်ရေးတို့အတွက် အင်ကာရာက ကြိုးပမ်းလုပ်ဆောင်ရန် ဂရိနိုင်ငံခြားရေးဝန်ကြီးဌာနက တောင်းဆိုခဲ့သည်။