Top News

နိုင်ငံကို စစ်အုပ်ချုပ်ရေးအမိန့်ပြဋ္ဌာန်းရန် အချိန်မကြာလိုက်သည့် ကြိုးပမ်းမှုနှင့်ပတ်သက်၍ စွပ်စွဲပြစ်တင်ခံထားရပြီး သမ္မတတာဝန်ရပ်ဆိုင်းခံထားရသော သမ္မတယွန်းဆော့ယိုအတွက် ဖမ်းဝရမ်းကို တောင်ကိုရီးယားတရားရုံးက ထုတ်ပေးခဲ့သည်ဟု ဒီဇင်ဘာ ၃၁ ရက်တွင် စုံစမ်းစစ်ဆေးသူများက ပြောကြားခဲ့သည်။

ယွန်းသည် အရပ်ဘက်အုပ်ချုပ်ရေးကို ယခုလထဲတွင် ခဏတာရပ်ဆိုင်းခဲ့သောကြောင့် တောင်ကိုရီးယားနိုင်ငံသည် ဆယ်စုနှစ်များစွာအတွင်းအဆိုးရွားဆုံး နိုင်ငံရေးအကျပ်အတည်းအတွင်း သက်ဆင်းခဲ့ရသည်။

ယင်းသို့လုပ်ဆောင်ခဲ့ခြင်းကြောင့် ပါလီမန်က ၎င်း၏သမ္မတဆိုင်ရာ တာဝန်များကို ဖယ်ရှားခဲ့သည်ဆိုသော်လည်း ဖွဲ့စည်းပုံအခြေခံဥပဒေဆိုင်ရာ တရားရုံး ဆုံးဖြတ်ချက်ကမူ စွပ်စွဲပြစ်တင်မှုကို အတည်ပြုခြင်းရှိမရှိ ဆိုင်းငံ့ထားသည်။

“ပူးတွဲ စုံစမ်းစစ်ဆေးရေး ရုံးချုပ်က မေတ္တာရပ်ခံထားတဲ့ သမ္မတယွန်းဆော့ယိုအတွက် ဖမ်းဝရမ်းနဲ့ရှာဖွေဝရမ်းတို့ကို ဒီမနက်မှာ ထုတ်ပြန်ခဲ့ပါတယ်” ဟု ပူးတွဲစုံစမ်းရှာဖွေရေးရုံးချုပ်က ထုတ်ပြန်ချက်တွင် ဖော်ပြခဲ့သည်။

ကွန်ဆာဗေးတစ်ခေါင်းဆောင် ယွန်းဆော့ယိုသည် ပုန်ကန်မှုဆိုင်ရာ ရာဇဝတ်မှုစွဲချက်များကို ရင်ဆိုင်နေရသည်။ အဆိုပါစွဲချက်များသည် ထောင်ဒဏ်တစ်သက်တစ်ကျွန်း သို့မဟုတ် သေဒဏ်ကို ရင်ဆိုင်ရနိုင်သောစွဲချက်များဖြစ်သည်။

တာဝန်ရပ်ဆိုင်းခံထားရသော သမ္မတသည် စုံစမ်းမေးမြန်းခံရေးအတွက် သတင်းပို့ရန် တတိယအကြိမ်ပျက်ကွက်ခဲ့ပြီးနောက် ယွန်းဆော့ယို၏စစ်အုပ်ချုပ်ရေးအမိန့် ကြေညာမှုအတွက် ၎င်းကို စုံစမ်းစစ်ဆေးသော စုံစမ်းစစ်ဆေးသူများက ဒီဇင်ဘာ ၃၀ ရက်တွင် ဖမ်းဝရမ်းထုတ်ပေးရန်မေတ္တာရပ်ခံခဲ့သည်။

“ဝရမ်းအတွက် အကြောင်းပြချက်ကတော့ လူပုဂ္ဂိုလ်တစ်ဦးတစ်ယောက်က ကျိုးကြောင်း ဆီလျှော်မှုမရှိဘဲ ဆင့်ခေါ်မှုတွေကို လိုက်နာဖို့ ငြင်းပယ်ခွင့်ရှိနိုင်တယ်ဆိုတဲ့ စိုးရိမ်ပူပန်မှုရှိနေပါတယ်။ ရာဇဝတ်မှုကော်မရှင်ကို သံသယဖြစ်စေဖို့ လုံလောက်တဲ့ ဖြစ်နိုင်ခြေအကြောင်းရင်းလည်းရှိနေပါတယ်” ဟု အဂတိလိုက်စားမှု စုံစမ်းရေးရုံး၏တာဝန်ရှိသူက ဒီဇင်ဘာ ၃၁ ရက် သတင်းစာရှင်းလင်းပွဲတွင် သတင်းထောက်များကို ပြောကြားခဲ့သည်။

“ဝရမ်းဟာ ဇန်နဝါရီ ၆ ရက်အထိ တရားဝင်နေပါတယ်” ဟု တာဝန်ရှိသူကပြောကြားခဲ့ပြီး ယွန်းဆော့ယိုကို ရဲစခန်းသို့မဟုတ် ဆိုးလ်ထိန်းသိမ်းရေးစခန်းတွင်ချုပ်ထားနိုင်သည်ဟု ၎င်းက ဖြည့်စွက်ပြောသည်။

စွပ်စွဲပြစ်တင်ခံထားရသော သမ္မတအတွက် ဖမ်းဝရမ်းသည် တရားမဝင်၊ မခိုင်လုံဟု ယွန်း၏ရှေ့နေကပြောကြားခဲ့ပြီး စုံစမ်းစစ်ဆေးသူများသည် သမ္မတကို စုံစမ်းစစ်ဆေးရန် လုပ်ပိုင်ခွင့်အာဏာမရှိဟု ဆက်လက်ပြောကြားခဲ့သည်။

“စုံစမ်းစစ်ဆေးတဲ့ လုပ်ပိုင်ခွင့်အာဏာမရှိတဲ့ အေဂျင်စီရဲ့မေတ္တာရပ်ခံချက်နဲ့ ထုတ်ပြန်တဲ့ ဖမ်းဝရမ်း၊ ရှာဖွေ ဝရမ်း၊ ထိန်းသိမ်းဝရမ်းတို့ဟာ တရားမဝင်ပါဘူး။ ခိုင်လုံမှုမရှိပါဘူး” ဟု ရှေ့နေယွန်းကက်ကွန်းက ထုတ်ပြန်ချက်တွင် ဖော်ပြခဲ့ပြီး အဆိုပါထုတ်ပြန်ချက်ကို အေအက်ဖ်ပီသတင်းဌာနထံပို့ပေးခဲ့သည် ဟုသိရသည်။