Top News

အသက် ၂၅ နှစ်ခန့်ရှိ တောဆင်ရိုင်းတစ်ကောင်ကိုသတ်ဖြတ်ပြီး အရေခွံခွာသည့် ဆင်သတ်မုဆိုးအဖွဲ့အား သာပေါင်းမြို့နယ်တွင်ဖမ်းဆီးရမိကြောင်း ပြည်ထဲရေးဝန်ကြီးဌာနက နိုဝင်ဘာ ၂၃ ရက်တွင် သတင်းထုတ်ပြန်သည်။

ပုသိမ်ခရိုင် သာပေါင်းမြို့နယ် တောင်တန်းချောင်းဖျား၌  အသက် ၂၅ နှစ်ခန့်ရှိပြီး အမြင့် ခုနစ်ပေခွဲခန့်၊ အလျား ကိုးပေခန့်၊ အမြီး သုံးပေခန့်ရှိ တောဆင်ရိုင်း ဟိုင်းဆင် အထီးတစ်ကောင် အသတ်ခံထားရကြောင်း နှင့် ပုပ်ပွပြီး အရိုးများကျနေကြောင်း နိုဝင်ဘာ ၂၂ ရက်တွင် တွေ့ရှိခဲ့ကြောင်း သိရသည်။

အဆိုပါ ဆင်သေတွေ့ရှိသည့်နေရာသို့  မြို့နယ်သစ်တောဦးစီးဌာနမှ ဦးစီးအရာရှိ ဦးစိုးတင့်၊ သာပေါင်းမြို့မရဲစခန်းမှူး ဒုရဲမှူး မြင့်လွင်နှင့် ဆင်ဆရာဝန် ဒေါက်တာလင်းလင်းထွန်းပါ ပူးပေါင်းအဖွဲ့က သွားရောက်စစ် ဆေးရာ လွန်ခဲ့သောတစ်လခွဲခန့်က ဆင်သတ်မုဆိုးများက သတ်ဖြတ်ထားခြင်းဖြစ်ကြောင်း သိရသည်။

စုံစမ်းမှုအရ  လွန်ခဲ့သော တစ်လခွဲခန့် က တောင်တန်းချောင်းဖျား၌ တဲထိုးနေထိုင်သော သိန်းအောင်(၅၀ နှစ်) ပါ ငါးဦးအဖွဲ့က ပစ်သတ်ခြင်းဖြစ်ပြီး သတ်ဖြတ်ထားသည့် ဆင်သေမှ သားရေခွံများအား ကျပ်တိုက်ကာ ပီနန်အိတ်ဖြင့်ထုပ်ပိုး၍ ဆင်သတ်မုဆိုးအဖွဲ့မှ နေမင်းထွန်း (၄၅ နှစ်) က ရောင်းချရန် ယူဆောင်သွားခဲ့ကြောင်း၊ ဆင်ပစ်ရာတွင် အသုံးပြုခဲ့သော တူမီးသေနတ်ကိုလည်း ဝှက်ထားခဲ့ကြောင်း သိရသည်။

ဆင်သတ်မုဆိုးအဖွဲ့ထံမှ  ဆင်သတ်ရာတွင် အသုံးပြုခဲ့သည့် ယမ်းမှုန့်များထည့်ထားသော ရေသန့်ဘူးတစ်ဘူး၊ ပလတ်စတစ်ဆေး ထိုးပိုက် နှစ်ခု၊ ဝက်အူလှည့်တစ်ချောင်း၊ သံခွ လေးချောင်း၊ ပန်းသံတစ်ချောင်း၊ အရှည်သုံး လက်မခန့်ရှိ နတ်တိုင်သုံးချောင်း၊ ကျောပိုးအိတ်တစ်လုံး၊ သံဘောစေ့ ၁၂ လုံး၊ ဓားလေးချောင်း သိမ်းဆည်းရမိခဲ့ကြောင်း သိရသည်။

ဆင်သတ်မုဆိုးအဖွဲ့မှ သိန်းအောင်ပါ လေးဦးကို သာပေါင်းမြို့မရဲစခန်းတွင် (ပ) ၃၅၀/၂၀၁၈၊ ဇီဝမျိုးစုံမျိုးကွဲနှင့် သဘာဝနယ် မြေများကာကွယ်စောင့်ရှောက်ခြင်းဆိုင်ရာ ဥပဒေပုဒ်မ ၄၁ (က) ဖြင့် လည်းကောင်း၊  နေမင်းထွန်းကို ပုသိမ်မြို့မရဲစခန်းတွင် အဆိုပါ ဥပဒေပုဒ်မဖြင့်လည်းကောင်း ဖမ်းဆီးအမှုဖွင့် ထားကြောင်း သိရသည်။