Top News

ပြီးခဲ့သည့် ၂၀၂၄ ခုနှစ်က မွန်ပြည်နယ်အတွင်းရှိ တံတားခုနစ်စင်း မိုင်းထောင်ဖောက်ခွဲဖျက်ဆီးခံခဲ့ရကြောင်း သိရသည်။

ထိုသို့ မိုင်းထောင်ဖောက်ခွဲဖျက်ဆီးခံခဲ့ရသည့် တံတားများမှာ ရန်ကုန်-မော်လမြိုင် ားလမ်းမပေါ်ရှိ တံတားလေးစင်း၊ ဘီးလင်း-နတ်ကြီး-ဖာပွန်ကားလမ်းပေါ်ရှိ တံတားနှစ်စင်းနှင့် ရေး-ထားဝယ်ကားလမ်းပေါ်ရှိ တံတားတစ်စင်းတို့ဖြစ်ကြောင်း သိရသည်။

၂၀၂၄ ခုနှစ် ဖေဖော်ဝါရီ ၂၈ ရက် နံနက် ၃ နာရီခွဲခန့်က သထုံမြို့နယ် မိုးကောင်းကျေးရွာ ရန်ကုန်-မော်လမြိုင်ကားလမ်း မိုင်တိုင်အမှတ် (၁၃၅/၇) (၁၃၆/၀)ကြားရှိ တံတားအမှတ် (၄/၁၃၆) မိုးကောင်းတံတားမှာ မိုင်းခွဲဖျက်ဆီးခဲ့ရခြင်းဖြစ်သည်။

အလျား ၃၇ ပေခန့်၊ အကျယ် ၄၈ ပေခန့် ရှိ အဆိုပါ မိုးကောင်းတံတားမိုင်းထောင် ဖောက်ခွဲဖျက်ဆီးခံခဲ့ရသည့်အတွက် ရန်ကုန်-မော်လမြိုင်ကားလမ်း အဆက်အသွယ်ပြတ်တောက်သွားခဲ့ပြီး မော်တော်ယာဉ်များအနေဖြင့် သထုံ-ဘီးလင်းခရိုင်ချင်းဆက်လမ်းနှင့် ကျေးရွာချင်းဆက်လမ်းများမှ သွားလာခဲ့ကြရသည်။

မိုင်းခွဲဖျက်ဆီးခံခဲ့ရသည့် မိုးကောင်းတံတားအား သက်ဆိုင်ရာက ယာယီမြေသားဖို့ပြုပြင်ခဲ့ပြီးနောက် ယင်းနေ့ ည ၆ နာရီခွဲခန့်တွင် ရန်ကုန်-မော်လမြိုင်ကားလမ်းပေါ်မှ မော်တော်ယာဉ်များ ပြန်လည်သွားလာခွင့်ရ ရှိခဲ့ကြသည်။

ထို့အတူ ၂၀၂၄ ခုနှစ် မတ် ၆ ရက် နံနက် ၆ နာရီခန့်က မွန်ပြည်နယ် ဘီးလင်းမြို့နယ် နတ်ကြီးကျေးရွာအုပ်စု ပျဉ်သားကျေးရွာအနီး ဘီးလင်း-နတ်ကြီး-ဖာပွန်ကားလမ်း မိုင်တိုင်အမှတ် (၁၇/၇) နှင့် (၁၈/၀) ကြားရှိ တံတား အမှတ် (၆/၁၈) ပျဉ်သာတံတားမှာ မိုင်းခွဲဖျက်ဆီးခံခဲ့ရကြောင်းနှင့် မိုင်းခွဲဖျက်ဆီးခံခဲ့ရသည့်အတွက် အရှည်ပေ ၁၂၀၊ တံတားအကျယ် ၂၄ ပေရှိ သံကူကွန်ကရစ်အမျိုးအစား တံတားမှာ ပြိုကျပျက်စီးခဲ့ကြောင်း သိရသည်။

အလားတူ ၂၀၂၄ ခုနှစ် ‌မေ ၆ ရက် နံနက် ၆ နာရီခန့်ကလည်း ဘီးလင်းမြို့နယ်အတွင်းရှိ ဘီးလင်း-ဖာပွန်ကားလမ်း မိုင်တိုင်အမှတ် ၁၆/၂ နှင့် ၁၆/၃ ကြားရှိ တံတားအမှတ် ၃/၁၇၊ ကညင်ပင်ကွင်းတံတားမှာ မိုင်းထောင်ဖောက်ခွဲဖျက်ဆီးခံခဲ့ရကြောင်းနှင့် မိုင်းခွဲခံခဲ့ရသည့် ကညင်ပင်ကွင်းတံတားမှာ အရှည် ပေ ၈၀ ခန့် အကျယ် ၂၄ ပေခန့်ရှိ သံကူကွန်ကရစ်တံတားဖြစ်ကြောင်းနှင့် မိုင်းထောင်ဖောက်ခွဲခံလိုက်ရ သည့်အတွက်ကြောင့် တံတားတစ်စင်းလုံး ကျိုးကျပျက်စီးခဲ့ကြောင်း သိရသည်။

ထို့ပြင် ၂၀၂၄ ခုနှစ် မေ ၁၁ ရက် နံနက် ၃ နာရီ ၁၄ မိနစ်ခန့်က ရန်ကုန်-မော်လမြိုင်ကားလမ်း သထုံမြို့နယ်နှင့် ဘီးလင်းမြို့နယ်အစပ်ရှိ ကျုံအိတ်တံတားမှာ ဒုတိယအကြိမ်မြောက် မိုင်းထောင်ဖောက်ခွဲဖျက်ဆီးခံခဲ့ရကြောင်း၊ ထိုသို့မိုင်းထောင်ဖောက်ခွဲခံခဲ့ရသည့်အတွက်ကြောင့် ပထမအကြိမ် မိုင်းထောင်ဖောက်ခွဲဖျက်ဆီးခံခဲ့ရပြီးနောက် ယာယီထိုးထားခဲ့သည့် ဘေလီတံတားမှာလည်း ပြိုကျပျက် စီးခဲ့ရကြောင်းနှင့် ရန်ကုန်-မော်လမြိုင်ကား လမ်းမှာလည်း အဆက်အသွယ်ပြတ်သွားခဲ့ကြောင်း သိရသည်။

၂၀၂၄ ခုနှစ် မေ ၂၃ ရက် နံနက်အစောပိုင်းကလည်း မွန်ပြည်နယ် ဘီးလင်းမြို့နယ် ရွှေရောင်ပြကျေးရွာအုပ်စု တောင်ကလေးကျေးရွာအထွက် ရန်ကုန်-မော်လမြိုင်ကားလမ်းပေါ်ရှိ တံတားအရှည် ၁၀၆ ပေ၊ အကျယ်  ၂၄ ပေရှိတံတားအမှတ် (၁/၁၃၀) ဒေသအခေါ် မစောတံတားမှာ မိုင်းထောင်ဖောက်ခွဲဖျက်ဆီးခံခဲ့ရကြောင်းနှင့် မိုင်းထောင်ဖောက်ခွဲဖျက်ဆီးခံခဲ့ရသည့် မစောတံတားမှာ တံတား၏ သုံးပုံနှစ်ပုံမှာ ချောင်းအတွင်း ကျိုးကျပျက်စီးခဲ့သည့်အပြင် မစောတံတားချောင်းအတွင်း ဆိုင်ကယ်သုံးစီးပြုတ်ကျခဲ့သည့်အတွက် ဆိုင် ကယ်စီးနင်းလာသူ အမျိုးသားတစ်ဦး သေဆုံးကာ အမျိုးသားတစ်ဦးနှင့် အမျိုးသမီးနှစ်ဦး ပြင်းထန်ဒဏ်ရာရရှိကြောင်း လူမှုကူညီကယ်ဆယ်ရေးအသင်းများထံမှ သိရသည်။

ထို့အတူ ၂၀၂၄ ခုနှစ် ဇူလိုင် ၁၆  ရက် ည ၁၀ နာရီခွဲခန့်ကလည်း သထုံမြို့နယ် မိုးကောင်းကျေးရွာအုပ်စု ကရင်လေးဆိပ်ကျေးရွာအနီး ဗိုလ်ခမ်းကွင်းအရှေ့ ရန်ကုန်-မော်လမြိုင်ကားလမ်း မိုင်တိုင်အမှတ် (၁၃၄/၆) နှင့် (၁၃၄/၇) ကြားရှိ ကရင်လေးဆိပ်တံတားမှာ မိုင်းခွဲဖျက်ဆီးခံခဲ့ရကြောင်းနှင့် ကရင်လေးဆိပ်တံတား မိုင်းခွဲခံခဲ့ရသည့်အတွက်ကြောင့် တံတားအရှည် ၁၀ ပေခန့်၊ တံတားအကျယ် ၅၄ ပေခန့်ရှိ တံတားငယ်တစ်စင်းလုံး ပြိုကျပျက်စီးခဲ့ကြောင်း သိရသည်။

၂၀၂၄ ခုနှစ် နိုဝင်ဘာ ၂၂ ရက် နံနက် ၂ နာရီဝန်းကျင်ကလည်း မွန်ပြည်နယ်ရေးမြို့နယ် ကိုးမိုင်ကျေးရွာအနီး ရေး - ထားဝယ် ကားလမ်းပေါ်ရှိ ရေးမြို့ဘက်ခြမ်းရှိ ကိုးမိုင်တံတားချဉ်းကပ်လမ်းမှာ မိုင်းခွဲဖျက်ဆီးခံခဲ့ရ ကြောင်းနှင့် မိုင်းပေါက်ကွဲမှုအရှိန်ကြောင့် ကိုးမိုင်ပင်မတံတားထိခိုက်မှုရှိခဲ့သည့်အပြင်  ပေါက်ကွဲမှုအရှိန်ကြောင့် ကိုးမိုင်တံတားအနီးဝန်းကျင်ရှိ နေအိမ်တချို့ရှိ မှန်ပြတင်းပေါက်များ အက်ကွဲပျက်စီးမှုများရှိခဲ့ကြောင်း ဒေသခံများထံမှ သိရသည်။

ထိုကိုးမိုင်တံတားမှာ ထားဝယ်-ရေးကား လမ်းမမိုင်တိုင်အမှတ် ၁၀၇/၁ နှင့် ၁၀၇/၂ ကြားတွင်တည်ရှိသော တံတားအမှတ် (၁/၁၀၈) ဖြစ်ကြောင်း၊ အလျား ပေ ၁၈၀၊ အကျယ်  ၃၄ ပေရှိ သံကူကွန်ကွန်ကရစ်တံတားအမျိုးအစားဖြစ်ကြောင်းနှင့် ၂၀၀၂ ခုနှစ် ဇွန် ၁ ရက်က စတင်တည်ဆောက်ခဲ့ပြီး ၂၀၀၃ ခုနှစ် မေ ၃၁ ရက်တွင် တည်ဆောက်ပြီးခဲ့သည့် တံတားတစ်စင်းဖြစ်ကြောင်း သိရသည်။

၂၀၂၃ ခုနှစ် ဇွန် ၂၉ ရက် နံနက် ၄ နာရီ ခွဲခန့်ကလည်း သထုံမြို့နယ်နှင့် ဘီးလင်းမြို့နယ်ကြား ရန်ကုန်-မော်လမြိုင်ကားလမ်းမိုင်တိုင်အမှတ် (၁၃၁/၆) နှင့် (၁၃၁/၇)ကြားရှိ တံတားအမှတ် (၁၃၂/၃) ကျုံအိတ်တံတားမှာ ပထမအကြိမ် မိုင်းထောင်ဖောက်ခွဲဖျက်ဆီးခံခဲ့ရကြောင်းနှင့် တံတားမိုင်းခွဲခံရသည့်အ တွက် တံတားတစ်ခြမ်းပြိုကျပျက်စီးခဲ့ကြောင်း၊ တံတားကျိုးကျချိန်တွင် အိမ်စီးကားသုံးစီးပျက်စီးခဲ့ရာ နှစ်စီးမှာ ချောင်းအတွင်း ပြုတ်ကျပျက်စီးခဲ့ပြီး အမျိုးသားတစ်ဦးသေဆုံးခဲ့ပြီး တစ်ဦး ထိခိုက်ဒဏ်ရာများရရှိခဲ့ကြောင်း သိရသည်။