Top News

နှစ်သစ်ကူးအကြိုညတွင် ဖူလ်ဟမ်အသင်း၏ဆားဘီးယားတိုက်စစ်မှူး မီထရိုဗစ်နှင့် ခရစ္စတယ်ပဲလေ့စ်အသင်း၏ ဆားဘီးယားကွင်းလယ်လူ မီလီဗိုယီဗစ်တို့ အတူပျော်မြူးနေကြသည့် ဗီဒီယိုဖိုင်ထွက်ပေါ်လာခဲ့ပြီးနောက် ဖူလ်ဟမ်အသင်းနှင့် ခရစ္စ တယ်ပဲလေ့စ်အသင်းတို့သည် ယင်းဖြစ်ရပ်အား ပြန်လည်စုံစမ်းစစ်ဆေးလျက်ရှိကြောင်း သိရသည်။

Instagram တွင် ထွက်ပေါ်လာသော ယင်းဗီဒီယိုဖိုင်၌ မီထရိုဗစ်နှင့် မီလီဗိုယီဗစ်တို့သည် အခြားလူပုဂ္ဂိုလ် (၇)ဦးခန့်နှင့်အတူ အခန်းကျယ်တစ်ခုအတွင်းရှိနေပြီး ''Happy New Year''ဆိုသည့် အော်ဟစ်သံများကိုလည်း ကြားခဲ့ရကြောင်း သိရသည်။ 

Tier 4 ဧရိယာသတ်မှတ်ထားသော လန်ဒန်မြို့တွင် ယင်းကဲ့သို့ အိမ်ထောင်စုတစ်ခုနှင့်တစ်ခု ပူးပေါင်းပြီး လူစုဝေးခွင့်မရှိရာ မီထရိုဗစ်နှင့် မီလီဗိုယီဗစ်တို့၏လုပ်ရပ်များမှာ သတ်မှတ်ထားသော စည်းမျဉ်းစည်းကမ်းများကို ချိုးဖောက်ရာကျနေသည်။ 

ယင်းဗီဒီယိုဖိုင်ကို မီထရိုဗစ်၏ချစ်သူ ယန်ယစ်က ရိုက်ကူးကာ Instagram သို့ တင်ခဲ့ခြင်းဖြစ်ပြီး မီလီဗိုယီဗစ်၏ဇနီးဖြစ်သူ မီလီကာကိုလည်း Tag တွဲခဲ့ကြောင်း သိရှိရသည်။ 

များမကြာမီအချိန်တွင် ယန်ယစ်သည် သူ၏ Instagram အကောင့်ကို ဖျက်သိမ်းခဲ့သော်လည်း ယင်းဗီဒီယိုဖိုင်မှာ အွန်လိုင်း၌ ပျံ့နှံ့ခဲ့ကြောင်း သိရှိရသည်။ 

မီထရိုဗစ်ကစားနေသော ဖူလ်ဟမ်အသင်းမှာ မကြာသေးမီက ကိုရိုနာဗိုင်းရပ်စ်ရောဂါပိုးတွေ့ရှိသည့် အသင်းများထဲ၌ ပါဝင်ခဲ့ပြီး ပြီးခဲ့သည့်တစ်ပတ်အတွင်း ကစားရန်ရှိသည့် ပရီးမီးယားလိဂ်ပွဲစဉ် (၂)ပွဲကို ရွှေ့ဆိုင်းထားရသည်။