Top News

ပုသိမ်မြို့တွင် အကောင်အထည်ဖော် ဆောင်ရွက်ခဲ့သည့် ဥမ္မာဒန္တီ တန်ဖိုးနည်း အိမ်ရာနှင့် တန်ဖိုးသင့်အိမ်ရာ စီမံကိန်းမှာ ပြည်သူများအား ရောင်းချနိုင်ရေးအတွက် တိုက်ခန်းပေါင်း ၆၀၀ ကျော်ထိ ထည့်သွင်းတည်ဆောက် ခဲ့သော်လည်း တိုက်ခန်းပေါင်း ၅၀ ခန့်သာ ဝယ်ယူမည့်သူရှိခဲ့ပြီး အခန်းပေါင်း ၅၅၀ ခန့်မှာ ဝယ်ယူမည့်သူ မရှိကြောင်း သိရသည်။

မြို့ပြနှင့်အိမ်ရာ ဖွံ့ဖြိုးရေး ဦးစီးဌာနမှ အကောင်အထည်ဖော် ဆောင်ရွက်ခဲ့သည့် ဥမ္မာဒန္တီ တန်ဖိုးနည်း အိမ်ရာနှင့် တန်ဖိုးသင့်အိမ်ရာ စီမံကိန်းတွင် အငှားစနစ်၊ လက်ငင်းစနစ်၊ အရစ်ကျငွေပေးသွင်းသည့် စနစ်များဖြင့် ဆောက်လုပ်ရေးနှင့် အခြေခံအအောက် အအုံဖွံ့ဖြိုးရေးဘဏ်တွင် ၁၅ နှစ်အထိ အရစ်ကျစနစ်ဖြင့် ချေးငွေများရယူကာ ဝယ်ယူနိုင်သော်လည်း အငှားတိုက်ခန်းများသာ ငှားရမ်းရရှိခဲ့ပြီး အရောင်းတိုက်ခန်းများမှာ ဝယ်ယူမည့်သူများ မရှိသည့်အဖြစ်ကို ကြုံတွေ့နေရကြောင်း၊ တိုက်ခန်းများတန်ဖိုးမှာ ၈၂ သိန်း ကျပ်မှ စတင်ကာ ၃၄၀ သိန်းကျပ်ထိရှိပြီး တိုက်ခန်းများ၏ တည်ရာနေရာနှင့် တည်ဆောက်ထားသည့်ပုံစံများ ရေပေးဝေရေးစနစ် စသည့်အခက်အခဲများကြောင့် တည်ဆောက်ဖွင့်လှစ်ပြီးနောက် တစ်နှစ်ခန့်ကြာသည်အထိ ဝယ်ယူမည့်သူ နည်းပါးနေလျက်ရှိကြောင်း သိရသည်။

“အိုးအိမ်ဦးစီးဌာနက လုပ်တာ၊ ကျွန်တော်တို့ အရောင်းဆိုရင်တော့ အခန်းပေါင်း ၆၀၀ ကျော်လောက်ရှိတာပေါ့၊ လေးငါးဆယ် လောက်ပဲ ရောင်းရသေးတယ်။ စျေးနှုန်းတွေ ကလည်း ၈၂ သိန်းကနေ စတာပေါ့နော်။ အကျယ်အဝန်းပေါ် မူတည်ပြီးတော့ သိန်း ၄၀၀ လောက်ထိရှိပါတယ်။ စျေးကွက်ကျတော့ ရန်ကုန်လောက် သိပ်ပြီးတော့ အဝယ်မလိုက် တဲ့အနေအထားရှိပါတယ်။ အငှားကတော့ တစ်ရာကျော်လောက်ရှိတယ်။ အခန်းပေါင်း အဲဒါကတော့ ကျွန်တော်တို့ ငှားတာ ကုန်သ လောက်ရှိနေပါပြီ။ သူက သူ့စည်းမျဉ်းစည်းကမ်း တွေနဲ့ပေါ့နော်။ အငှားကိုလည်းလျှောက် လွှာတင်ပြီးတော့ မဲစနစ်တွေ ဘာတွေနဲ့ ရောင်းချပေးတာ ရှိပါတယ်” ဟု ဧရာဝတီတိုင်းဒေသကြီး အစိုးရအဖွဲ့ဝင် လျှပ်စစ်၊ စက်မှု လက်မှုနှင့် လမ်းပန်းဆက်သွယ်ရေးဝန်ကြီး ဦးဝင်းဌေးက ပြောသည်။

တန်ဖိုးနည်းနှင့် တန်ဖိုးသင့်အိမ်ရာများ ရောင်းချရာတွင် မအောင်မြင်ရသည့် အကြောင်းနှင့် ပတ်သက်၍ ပုသိမ်မြို့မှ အိမ်ခြံမြေ အကျိုးတော်ဆောင် တစ်ဦးဖြစ်သူ ဒေါ်မေသဥ္ဇာအောင်က “အဓိကကတော့ ဆိုရှယ်ပိုင်းကလည်း အရမ်းအားနည်းတယ်။ ပြီးတော့ ဘဏ်နဲ့ချိတ်ဆက်တဲ့ အခါမှာလည်း အချက်အလက်တွေက အရမ်းများတော့လေ။ အဲဒါကြောင့်မို့ အဆင်မပြေဘူးလို့ ထင်တယ်။ နောက်မြို့နဲ့ နည်းနည်း အလှမ်းဝေးတယ်။ မြို့ထဲပိုင်းနဲ့ နည်းနည်းလေး ဝေးနေတာကြောင့်လည်းပါမယ်။ အဓိကကတော့ ကြော်ငြာအားနည်းနေတာပေါ့။ လူတွေသိပ်မသိကြသေးဘူး။ ညီမတို့ အကျိုးဆောင်တောင်မှ သိတာမကြာသေးဘူး။ အဲဒီလိုဖြစ်နေတယ်။ တန်ဖိုးနည်းအိမ်ရာဆိုတော့ သူကအခု တစ်ရာကျော်ကျော် လောက်ပဲရှိတော့ သက်သာတယ်လို့တော့မြင်တယ်။ တခြားနေရာတွေ ထက်ပြီးတော့ အရစ်ကျနှုန်းကလည်း သက်သာတယ်လို့ မြင်တယ်။ ရှစ်သောင်း၊ ကိုးသောင်း၊ တစ်သိန်း အဲဒီလောက်ကနေစပြီး ပေးလို့ရတယ်ဆိုတော့ သက်သာတယ်လို့တော့ မြင်ပါတယ်။ အခန်းဖွဲ့စည်းပုံတွေကတော့ မိသားစုနဲ့ဆိုရင် နည်းနည်းကျဉ်းတယ်လို့ ခံစားရတယ်။ အရမ်းတော့မကျယ်ဘူး” ဟု ပြောကြားသည်။

ဧရာဝတီတိုင်းဒေသကြီးအတွင်း မြို့ကြီးအချို့တွင် တန်ဖိုးနည်းအိမ်ရာ စီမံကိန်းများ ဆက်လက် ဆောင်ရွက်နေသော်လည်း တည်ဆောက်ပြီးစီးခဲ့သည့် ဥမ္မာဒန္တီတန်ဖိုးနည်း အိမ်ရာမှာ လက်ရှိအချိန်ထိ လူနေထိုင်မှု နည်းပါးနေပြီး စည်ကားမှုမရှိသည့် အိမ်ရာဝန်းတစ်ခု ဖြစ်နေသည်ကို တွေ့ရသည်။