Top News

လက်ဘနွန်တွင် အကျင့်ပျက်ခြစားမှုနှင့် ဂိုဏ်းဂဏစွဲမှုများအား ဆန့်ကျင်သည့် နိုင်ငံတစ်ဝန်း မကြုံစဖူး ဆန္ဒပြမှုများသည် နှစ်ပတ်နီးပါးကြာ ဖြစ်ပွားခဲ့ပြီးနောက် ဝန်ကြီးချုပ် ဆာအိဟာရီရီက ၎င်း၏အစိုးရအဖွဲ့ နုတ်ထွက်လွှာကို အောက်တိုဘာ ၂၉ ရက်တွင် တင်သွင်းခဲ့သည်။ ဟာရီရီ၏ ရုပ်သံမိန့်ခွန်း ပြောကြားစဉ် အောက်တိုဘာ ၁၇ ရက်နောက်ပိုင်း အင်အားစုစည်းနိုင်ဆဲဖြစ်သည့် ဆန္ဒပြလူအုပ်ကြီးက အောင်ပွဲခံခဲ့ကြသည်။

အပြောင်းအလဲကို တောင်းဆိုရန် လမ်းပေါ်ထွက်လာခဲ့ကြသည့် လက်ဘနွန်ပြည်သူ အများအပြား၏ဆန္ဒကို တုံ့ပြန်ရန် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ဝန်ကြီးချုပ်ရာထူးမှ နှစ်ကြိမ်နုတ်ထွက်ခဲ့ဖူးသည့် ဟာရီရီက ပြောကြားခဲ့သည်။ ဆန္ဒပြသူများ၏ အကြီးမားဆုံး အောင်ပွဲ မဟုတ်သေးသော်လည်း ထိုနုတ်ထွက်မှုအား သမ္မတက လက်ခံခဲ့လျှင် အစိုးရသစ်ဖွဲ့စည်းနိုင်ရေးကို ပါလီမန်က တာဝန်ယူရတော့မည် ဖြစ်သည်။

မြေပြင်အခြေအနေ၌ ဆန္ဒပြသူများနှင့် လုံခြုံရေးတပ်ဖွဲ့ဝင်များအကြား တင်းမာမှု မြင့်တက်နေစဉ် မပြေမလည်ဖြစ်နေသော ညွန့်ပေါင်းအစိုးရအဖွဲ့အတွင်းမှ ဝန်ကြီးနေရာများအား ဟာရီရီက ပြင်ဆင်ခန့်အပ်မှုများ ပြုလုပ်ခဲ့ပြီးနောက် ရက်ပိုင်းအတွင်း ယခုကြေညာချက် ထွက်လာခဲ့ခြင်းဖြစ်သည်။ ဆန္ဒပြသူများနှင့် တန်ပြန်ဆန္ဒပြသူများအကြား ထိပ်တိုက်တွေ့မှုများကြောင့်လည်း ပိုမိုနက်ရှိုင်းသော အရပ်ဘက်ပဋိပက္ခများထဲသို့ သက်ဆင်းမည်ကို စိုးရိမ်နေရသည်။

ရာထူးမှနုတ်ထွက်မှုသည် လတ်တလော အကျပ်အတည်းမှ သိက္ခာရှိစွာ ထွက်ခွာနိုင်ရန် တစ်ခုတည်းသောနည်းလမ်းဖြစ်သောကြောင့် ဟာရီရီက အဖြေရှာနိုင်ရန် လမ်းဖွင့်ပေးလိုက်ခြင်းဖြစ်ကြောင်း Levant Institute for Strategic Affairs မှ ဒါရိုက်တာ ဆာမီနာဒီယာက ပြောကြားခဲ့သည်။

ယင်းကဲ့သို့ နုတ်ထွက်မှုအား ကြိုဆိုသော်လည်း မလုံလောက်သေးကြောင်း၊ စနစ်တစ်ခုလုံး ပြောင်းလဲပစ်ရန် လိုလားကြောင်း ကလေးနှစ်ဦး၏မိခင်ဖြစ်သူ အသက် ၃၅ နှစ်ရှိ တီမာဆမီယာက ပြောကြားခဲ့သည်။ ဆီဒန်မြို့မှ ဆန္ဒပြသူတစ်ဦးဖြစ်သော အာဟက်မာဒီက ဝန်ကြီးချုပ်သည် ၎င်းတို့၏မြို့မှဖြစ်ပြီး ၎င်းအား အမြဲတမ်းကြိုဆိုခဲ့ကြောင်း၊ သို့သော် ယနေ့အချိန်တွင် လူများက အပြောင်းအလဲ လိုလားနေကြောင်း ပြောကြားခဲ့သည်။ ဂိုဏ်းဂဏစွဲကို အခြေပြုသော အုပ်ချုပ်ပုံစနစ်ကို လုံးဝပြုပြင်ပြောင်းလဲမှု ပြုလုပ်ရန် ဆန္ဒပြသူများက အခိုင်အမာတောင်းဆိုခဲ့ကြသည်။

လက်ဘနွန်နိုင်ငံရေးခေါင်းဆောင်များ အနေဖြင့် အစိုးရသစ်အား အလျင်အမြန်ဖွဲ့စည်းရန် အမေရိကန်နိုင်ငံခြားရေးဝန်ကြီး မိုက်ပွန်ပီယိုက အောက်တိုဘာ ၂၉ ရက်တွင် တိုက်တွန်းခဲ့သည်။ ပြီးခဲ့သော ၁၃ ရက်အတွင်း လက်ဘနွန်ပြည်သူများ၏ ငြိမ်းချမ်းစွာဆန္ဒပြမှုများနှင့် ထုတ်ဖော်မှုများက အချိန်တိုတိုနှင့် အကျိုးများပြီး ထိရောက်သော အစိုးရ၊ စီးပွားရေးဆိုင်ရာ ပြုပြင်ပြောင်းလဲမှု၊ အမြစ်တွယ်နေသော အကျင့်ပျက်ခြစားမှု တိုက်ဖျက်ရေးတို့အား လိုလားနေမှုကို ပြသလိုက်ခြင်းဖြစ်ကြောင်း ၎င်းက ပြောကြားခဲ့သည်။

ဟာရီရီ၏ ထိပ်တန်းမဟာမိတ်နှင့် လက်ဘနွန်အား ဒေါ်လာ ၁၁ ဘီလျံတန်ဖိုးရှိ အရေးပါသော အကူအညီပေးရန် အစီအစဉ်တွင် အဓိကမိတ်ဖက်ဖြစ်ခဲ့သည့် ပြင်သစ်က ၎င်းနုတ်ထွက်မှုသည် အကျပ်အတည်းကို ပို၍ ဆိုးရွားသွားမည်ကို စိုးရိမ်နေသည်။

ပြိုလဲမှုနီးနီးအခြေအနေကို လပေါင်းများစွာ ကြုံတွေ့ခဲ့ရသော စီးပွားရေးပြန်လည်ရှင်သန်လာစေရန် စီးပွားရေးဆိုင်ရာ ပြုပြင်ပြောင်းလဲမှုအစီအစဉ်များအား ဟာရီရီက ပြီးခဲ့သောသီတင်းပတ်တွင် ကြေညာခဲ့သော်လည်း ဆန္ဒပြသူများ၏ဒေါသကို လျော့ကျစေရန် မစွမ်းဆောင်နိုင်ခဲ့ပေ။